Hernaniko Kirol Sariak jasotzeko sei hautagai proposatu dituzte herriko kirol klubek, eta baten edo bestearen alde botoa emateko aukera izango dute 16 urtetik gorako herritarrek, hil honen 31ra arte, kiroldegian, Biterin edo www.hernani.eus webgunean.
Hautagaiak proposatzeaz gain, hauen merituak ere azpimarratu nahi izan dituzte, Hernaniko Kirol Klubek.
Merituak, azpimarratu
Emakumezko kirolariari sarirako, Jone Irastorza judoka eta Maialen trainerua proposatu dituzte. Irastorzaren kasuan, nabarmendu dute Gipuzkoako emakume bakarra dela, 6garren DAN lortzen, eta Maialen traineruaren kasuan, besteak beste, Euskotren Ligarako sailkatze estropada jokatu izana, Kontxako Bandera jokatu izana edota Madalenetako ikurriña irabazi izana.
Gizonezko kirolariari sarirako, berriz, Aitor Gorrotxategi aipatu dute, besteak beste, munduko eta Gipuzkoako txapelketak edota Berria txapelketa irabazi izanagatik, eta Ibai Alba, Espainiako distantzia luzeko duatloi txapelketa, bakarka nahiz taldeka irabazi izanagatik, besteren artean.
Hernani Saria jasotzeko, bestalde, Juan Rodriguez, Hernani Errugbi Elkarteko presidentea, eta Luis Llopis, Real Madrileko bigarren entrenatzailea proposatu dituzte. Rodriguez Ohorezko Mailako azpixapeldun izana da lau aldiz, jokalari gisa, eta entrenatzaile eta presidente moduan ere hainbat txapelketa irabazi ditu. Llopis, berriz, Espainiako Futbol Federazioko atezainen entrenatzailea da, eta hainbat klubetatik pasa ondoren, Real Madrilen dabil orain.