Hamabi herrialderen artean, bakarra izan zitekeen txapeldun, eta Hernanik, erdi pareko postua lortu du, Errusian jokatu duen Zazpiko Errugbiko Europako Txapelketan.
Aurkariei ez ezik, beroari ere egin behar izan diote aurre mutilek, baina denari hartu diote neurria. Larunbatean, hiru partiduetatik bat irabazi zuten: Grasshopper (Suitza) 10-29 Hernani. St Petesburgen aurrean eta Buslyren aurrean, hurrenez hurren, 21-14 eta 45-0 galduta ere, final laurdenetarako sailkatu ziren.
Atzo, aurreneko lehian galdu egin zuten, 19 eta 14, Krasnoyarren kontra, baina Grasshopper izan zuten berriro aurkari gero, eta berriro irabazi zuten hernaniarrek, 7 eta 19. Horrela, bosgarren postua lortzeko lehian ibili ziren, baina 33 eta 24 galduta, seigarrenean geratu ziren.
Liga salbatzeko, Cisneros
Beste kezka bat ere izan dute asteburuan, hernaniarrek; Ohorezko Mailara igotzeko norgehiagoka. Burgosek irabazi zion atzo, Cisnerosi.
Beraz, Hernanik mailari eusteko play offa Cisnerosen kontra jokatu beharko du. Joanekoa, Sevillan, datorren asteburuan, eta bueltakoa etxean, hurrengoan.