Astebete bakarrik falta da, GoizuTrail mendi lasterketaren bosgarren ediziorako: datorren larunbatean izanen da, 09:00etan hasita. Eta beraz, azkeneko prestaketak egiteko garaia dute partehartzaileek, puntu-puntuan iristeko.
Oraindik izena eman ez dutenek, berriz, azkeneko egunak dituzte apuntatzeko, interneten: www.herrikrosa.eus. 20 euro dira, 25 kilometroko ibilbiderako; eta 15 euro, 10 kilometroko probarako. Goizuetarrek, 5 euroko deskontua izanen dute bietan. Eta badute beste pizgarririk ere, herrikoek! Lasterketa bukatzen duten goizuetarren artean, bi lagunentzako afaria zozketatuko dute; berdin dio ibilbide luzea edo motza izan.
50 korrikalari inguru daude oraingoz, distantzia bakoitzerako. Eta izena emandakoen artean, ageri dira maila haundiko korrikalariak; ibilbide luzean bereziki: Oihana Kortazar, Gorka Herce, Asier Apezetxea, Jokin Egurbide, edota Hodei Lujanbio goizuetarra bera.
Horiek, Eneko Elorrin gora aurreneko buelta egin ondoren, Mandoegira igo beharko dute, guztira 1.636 metroko desnibel positiboa gainditzeko. Ibilbide motzekoek, berriz, Eneko Elorriko buelta eginda bukatuko dute herrian, 631 metroko desnibelarekin.
Ereñotzuko mendi lasterketa, bi aste beranduago
GoizuTrail egin eta bi astera, ekainaren 3an, izango da Ereñotzuko mendi lasterketa. Azkeneko urteetako ibilbidea izango du (12 kilometro eta 832 metroko desnibel positiboa); eta izenematea zabalik dago, www.kirolprobak.com webgunean. 10 euro dira.