2015eko maiatzean abiatutako legealdia azken urtean sartu da dagoeneko. Hori dela eta, Udalak hiru urte hauetan egin duen ibilbideari buruz herritarrek duten iritzia jakin nahi du.
Horretarako, inkesta soziologiko bat enkargatu dio Aztiker soziologia ikerguneari. 600 herritarrei egingo zaie inkesta, aurrez aurre, zozketa bidez, eta irizpideak kontuan hartuta adin tarte, genero eta auzo guztiek ordezkaritza orekatsua izan dezaten.
32 galdera gai askori buruz
32 galdera sorta da inkesta, eta herritarrek gai askori buruz duten iritzia adierazteko aukera izango dute.
Hiru urte hauetan Udalak hainbat gaietan (ingurumena, euskera, gazteria, tokiko garapena, ekonomia, bizikidetza, zerbitzu sozialak, parte-hartzea...) hartutako erabakiak eta gauzatu dituen egitasmoen ingurukoak izango dira galdera horiek.
Horrekin batera, herritarrei eskaintzen zaizkien zenbait zerbitzuren edota erabakitzeko foro eta kontseiluren ezagutza edota erabilera maila ere neurtzeko balioko du.
Udalak prentsa ohar bidez adierazi du Udalaren xedea, herri erakundea den heinean, herritarrei zerbitzua ematea dela eta «inkestaren emaitzak kontuan hartuta, antzeman daitezkeen hutsuneak eta beharrak oso kontuan hartuko ditu eta horiek asetzeko bideak martxan jarriko ditu Udalak».