Asteburu intensoa izango da, pelotari eta palista hernaniarrentzat. Izan ere, zenbait final jokatuko dituzte, gaurtik.
Gipuzkoako Trinkete Txapelketarekin daukate aurreneko zita, palistek. Gaur izango da, arratsaldeko 18:00etan hasita, Donostiako Gaskan. Eta gauza bat garbi dago: Hernanira etorriko dira bi txapelak, nagusien lehenengo mailan. Izan ere, bi bikote hernaniar ariko dira aurrez aurre: Amaia Irazustabarrena eta Ariane Arrieta, Maider Huizi eta Amaia Araiztegiren kontra.
GRAVNIko finalak, bihar eta etzi
Eta asteburuan, bihar eta etzi, beste hiru finaletan izango dira hernaniarrak, GRAVNI torneo garrantzitsuan.
Palarekin, trinketeko finala jokatuko du bihar Alaitz Tejedorrek, gazteen kategorian. Gasteizko Astronomos frontoian jokatuko du arratsaldeko 17:00etan hasita; Leire Galdos lagun duela, Iparraldeko bikotearen kontra.
Eta palarekin baita ere, baina ezker horman, jokatuko du finala Amaia Irazustabarrenak, Maider Mendizabalekin, Arabaren kontra. Igandean izango da hori, 10:00etan hasita, Gasteizko Ogetan.
Frontoi berean jokatuko dute beraien finala, baita ere, eskuz ariko diren hernaniarrek: Ioritz Arrietak eta Markel Lizeagak. Baina bihar izango da beraiena, 17:30etan hasita, Ogetan. Yoldi eta Sarasa nafarrak izango dituzte aurrean, eta partidu berdindua espero da, afizionatu mailako lau pelotari onenetakorekin.
Beste 20 partidu asteburuan, pelotari hernaniarrek
Eskuz, beste 20 partidu ere jokatuko dituzte hernaniarrek, maila guztietan. Udaberri torneoan, partidurik galdu gabe jarraitu nahi dute Elizazu eta Iturbe alebinek, bihar 17:30etan Hernanin; eta Jara eta Etxarri infantilek, gaur 18:30etan Andoainen. Gaur bertan, Hernanin ere izango dira partiduak; 19:30etan hasita, infantil mailako hiru partidu. Bihar, aldiz, 15:30etan hasiko da jaialdia, kiroldegiko frontoian.
Eta igandean 11:00etan, hasiko da Hernaniko pelota eskolaren txapelketa. 10 bikote ariko dira benjaminetan, eta beste 8 bikote alebinetan.