Karta jokoak bere tokia izango du aurten ere, Hernaniko San Joan jaietan, eta bigarrenez egingo da, Kronikaren San Joanetako Mus Txapelketa Mistoa. Iazko esperientzia ona eta sortu zen giro ederra ikusita, berriro antolatu du txapelketa Kronikak: ekainaren 24an izango da, San Joan egunez, arratsaldeko 17:30etan hasita. Aurten, Atsegindegin jokatuko da, eguraldi ona eginez gero; txarra egingo balu, ordea, Gay Murrera mugituko litzateke.
Izenematea, astelehenetik aurrera zabalik
Txapelketan parte hartu nahi duten bikoteek, etzitik aurrera daukate apuntatzeko aukera: emaila bidali jon@kronika.eus helbidera, deitu 943 33 08 99 edo 688 660 714 telefonora, edota whatsapp bidez idatzi azkeneko horretara. Egunean bertan ere izango da aukera, Atsegindegin, 17:00etatik 17:30etara. Ordu horretan egingo da aurreneko kanporaketaren zozketa, eta hasiko da txapelketa.
20 euro dira bikoteko, eta baldintza bakarra da, bikoteak mistoak izatea; neska eta mutil banak osatuak. Gainera, bikoterik ez daukatenek ere, aukera daukate apuntatzeko: zerrenda bat egingo da, eta horien artean, bikoteak osatuko dira, txapelketan parte hartzeko!
Joan den urtean, 14 bikotek hartu zuten parte txapelketa mistoan, eta Laurak eta Mikelek jantzi zituzten txapelak, final estuan Silvia eta Bengoetxeari irabazi ondoren.
Sari potoloak, onenentzat
Baina txapelak bakarrik ez, sari gehiago izango dira onenentzat; sari potoloak. Irabazleek, jasoko dituzte txapelak, trofeoak, oroigarriak, lau txuleta, Arriatzu dendak jarritako bi barazki saski, bi otordu Akarregin eta Kide tabernak emandako bi botila ardo; bigarrenek, trofeoak, oroigarriak, bi pala artistiko, bi otordu Errioguardan, Akarregi sagardotegiak jarritako bi kaja sagardo, eta Aitan-Etxe tabernak emandako bi botila ardo; eta hirugarrenek, trofeoak, oroigarriak, Ibai-Mendiko bonoa, Balerdi harategiak emandako gazta bat eta Aitan-Etxeren bi botila ardo.