Urumea Bizi erakusketa dago ikusgai kultur etxean ekainaren 22ra arte, Urumea ibaiaren inguruko Ramon Arambarriren argazkiekin osatutakoa. Goizeko 09:00etatik 20:30etara ikusi daiteke, egunero; eta gainera, ekintzak ere burutzen ari dira horren bueltan.
Gaur izango da aurrenekoa: mendi-irteera. Goizeko 09:30etan abiatuko dira Foru Plazatik Santiomendirantz, bertatik ere atera ahal izango da, eta handik, Landarbaso-Epelerako bidea hartuko dute. Ez da mendi-irteera soila izango, Marko Sierra eta Jesus Rubio nekazaritza ingeniariek gidatuko dute-eta.
Familientzat plana, biharko
Bihar ere, familientzako plana antolatu dute. Urumea ibaiko eta Astigarragako lehenengo biztanleak izenburupean, tailerra eskainiko du Aranzadi Zientzia Elkarteko Jesus Tapiak.
Modu praktiko batean, irakatsiko du lehenengo biztanle horiek non eta nola bizi ziren. Gainera, sua pizten eta arkuak egiten ikasi ahal izango da.
Goizeko 10:30etatik aurrera izango da hori, Santiomendiko baselizan.
EKINTZAK: URUMEA BIZI ERAKUSKETAREN BUELTAN
- GAUR, mendi-irteera. Santiomenditik Landarbaso-Epeleraino. Goizeko 09:30etatik abiatuta Foru Plazatik. Marko Sierra eta Jesus Rubio nekazaritza-ingeniariekin.
- BIHAR, Urumea ibaiko eta Astigarragako lehenengo biztanleak tailerra familientzat. 10:30etan Santiomendiko baselizan. Aranzadi Zientzia Elkartearen laguntzaz gizaki horiek non eta nola bizi diren ikasi ahal izango dugu. Sua pizten eta historiaurreko arkuak erabiltzen irakatsiko digute. Familiei zuzendutako jarduera honen bitartez denboran bidaiatzeko aukera izango dugu gure arbasoak pixka bat hobeto ezagutuz. Jesus Tapiaren eskutik, Aranzadi Zientzia Elkarteko arkeologoa.
- EKAINAREN 12AN, ASTEARTEAN, Hitzaldia: Piriniotako muturluzea (Galemys pyrenaicus): ekologia eta kontserbazioa. Arratsaldeko 19:00etan, kultur etxean. Pirionioetako muturzalea edo ur-satorra Euskal Herriko animaliarik berezienetakoa den arren, oso ezezaguna zaigu oraindik. Satorren familiako ugaztun txikia da, mendiko erreka garbietan bizi dena, eta gainbehera nabarmenean dago bere banapen-eremu osoan zehar. Intsektujale honen ekologi eta kontserbaziorako funtsezko faktoreak aurkeztuko dizkigu hizlariak. Amaiur Esnaola Illarreta, Zoologia eta Animalia Zelulen Biologia Saila (EHU).
- EKAINAREN 22AN, OSTIRALA, Gaugiroan saguzarrekin. Iluntzeko 20:00etan, Kultur Etxean. Kiko Alvarez adituak ugaztun hegalari misteriotsu hauen zertzelada batzuk emango dizkigu lehenik, eta bokata jan eta gero, denok joango gara elkarrekin Astigarragan bizi diren saguzarrak ikustera. Kiko Alvarez biologian doktorearen eskutik.
*Horrez gain, Urumea bizi erakusketa ekainaren 22ra arte egongo da ikusgai Kultur etxean, goizeko 09:00etatik iluntzeko 20:30etara bitarte.
* Informazio gehiagorako edo izena emateko: www.haritzalde.org.