DOBERA eta Hernani Errotzen elkarteek antolatuta, Joseba Intxausti historialari eta euskaltzaleak hitzaldia emango du bihar, 18:30etan Biterin. Euskara eta Armenieraren artean hainbat lotura daudela defendatuko du. Beñi Agirre ariko da aurkezle lanetan eta Armeniaren euskal aurkezpena du izenburua hitzaldiak.
Intxaustiri mundu armeniarra ezagutzea interesatu izan zaio, baita harreman pertsonalengatik ere. Emakume armeniar batekin ezkondu zen 1993an. Intxaustik dio «nola ulertu Armenia eta Euskal Herria, tamainaz antzekoak, eta historia luzekoak izanik, hain historia ezberdinak izatea eta, aldi berean, guretzat hain eredugarria izatea; geopolitikatik eliz erritoetaraino doazen arazoak daude tarteko. Nola maitatu izan duten beren mundu idatzia, artea, musika...; batez ere, kultura idatziaren estimu hori, berezkoa».
UZEIren sortzaileetako bat
Joseba Intxausti Rekondo (1936, Segura) historialaria da, baina historialarienak ez diren hamaika lanetan ere nabarmendu da. Aitzindaria izan da euskeraren historia sozialaren eta Euskal Herriaren historia erlijiosoaren ikerketan, baita historiatik kanpo ere, bereziki euskararen terminologiaren arloan. Oso gaztetatik, garaiko garbizalekeriaren kontra agertu zen, eta UZEIren sortzaileetako bat izan zen eta Jakin aldizkariko nabarmenetakoa Joxe Azurmendi, Paulo Agirrebaltzategi eta Joan Mari Torrealdairekin batera.
Azken urteotan bi iker lerro nagusiri jarri dio arreta Joseba Intxaustik: euskeraren historia sozialaren ikerketa sistematikoaren jarraipena segurtatu du Euskaltzaindiaren Joanes Etxeberri proiektuaren bidez, eta Euskal Herriko historia erlijiosoaren ikerketan aitzindari lana egin du. Ohorezko euskaltzaina da 2004tik.