Hernanik lau ordezkari izango ditu GRAVNI torneoko finaletan, Gipuzkoa ordezkatzen. Amaia Irazustabarrenari gehitu behar zaizkio Alaitz Tejedor paletan, trinketean gazte mailan, eta Ioritz Arrieta eta Markel Lizeaga eskuz binakako ezker hormako txapelketan.
Azken hauek garaipen bikaina lortu zuten Logroñon Errioxaren kontra. Bi hernaniarrek 22-5 hartu zituzten mendean Prado eta Matute III, final erdian, eta asteburuan finala jokatuko dute Gasteizen, urteko txapelketarik garrantzitsuenean. Finalean Nafarroa izango dute aurkari. Ligaxkan nafarrak izan dira nagusi eta finalera zuzenean sartu dira, baina Arrieta eta Lizeaga sasoi betean iristen dira.
Alaitz Tejedor palista ere GRAVNI torneoko finalera sailkatu da, Leire Galdos oiartzuarrarekin batera. Irurako trinketean, paletaz eta gazte mailan, 30-20 irabazi zioten bikote nafarrari eta finala Iparraldearen aurka jokatuko dute datorren asteburuan.
Eskuz zazpi garaipen 20 partidutatik txapelketa ofizialetan
Asteburuak beraz denetik izan du Hernaniko pelotarentzat. Jara eta Etxarrik, infantiletan, beste garaipen bat lortu zuten eta Udaberri Txapelketan partidu guztiak irabazi dituzte oraingoz. Eskuz, guztira, 20 partidu jokatu dituzte hernaniarrek eta zazpi garaipen eta 13 partidu galduak izan da balantzea.