Pleno lasai xamarra izan zen pasa den asteartekoa. Gai nagusia 2018ko aurrekontu aldaketaren hasierako onarpena izan zen eta Gobernu Taldearen bederatzi botorekin onartu zen. Oposizioko hiru alderdiek, aldiz, aurkako zazpi bozka eman zituzten. Aurrekontuari, beraz, 4.877.000 euro gehituko zaizkio.
Isa Sanchez Ogasun zinegotziak hartu zuen hitza eta gerakina nondik etorri den azaldu zuen, baita nora bideratuko dituzten inbertsioak ere. «2017ko ekitaldia urte berezia izan zen, aurreikusitako diru-sarrerak gehiago izan ziren, ez-ohikoak direnak, eta gastuak ere gutxitu egin ziren». Pasa den maiatzaren 23ko Kronikan argitaratu zen gerakina nora bideratuko den.
Bestalde, oposizioko taldeen aurkako botoaren arrazoiak azaldu zituzten bozeramaileek.
Andoni Amonarraiz EAJko bozeramailearen hitzetan, «ez zaigu gustatu nola tratatu den gaia, ez dugu parte hartu gerakina nora bideratu behar denaren eztabaidan eta gainera ez dugu bat egiten non gastatuko den».
Ondoren, hitza Orain Hernaniko Jaione Aristregik hartu zuen, eta «informazio falta» salatu zuen: «hauteskundeetatik urtebetera gaude, eta gauzatu ez diren inbertsioetako dirua gerakinean sartu izana, hauteskundeei begira egin dela iruditzen zaigu, gero hori nahi bezala erabiltzeko».
Ricardo Cresporen ustez ere gaia gaizki kudeatu da: «Gobernua gerakinaren zai egon dela ematen du aurrekontuak bideratzeko».
Isa Sanchez «haserre» agertu zen eta «inpotentzia» sentitu zuen oposizioen arrazoiekin. «Denbora egon da proiektuak zeintzuk diren jakiteko eta gerakina ez da sortu proiektuak egin ez direlako. Datorren urtean ez da horrelako aukerarik izango».
Beste gai batzuk ere landu zituzten; aho batez onartu ziren Gazte Bilguneari 3.700 euroko dirulaguntza bideratzea gazte-olinpiadak antolatzeko eta Udalak araututako aparkaleku sistemaren ordenantza aldatzea. Bestetik, 2017ko Kontu Orokorraren itxiera onartu zen Gobernu Taldea eta Orain Hernaniren aldeko botoekin, PSE-EEren aurkako eta EAJren abstentzioekin.