Hernaniko bost gazte zigortu ditu Espainiako Auzitegi Nazionalak, 2016ko Gudarien Egunean institutuan egindako ekitaldian «terrorismoari gorazarre» egiteagatik. Apirilaren hasieran eman zen ezagutzera epaia, eta orain, bere balorazioa egin du Hernaniko Ernaik. Herenegun egin zuten agerraldia, Atsegindegin.
Salaketa, «irmoki»
Ostiraleko prentsaurrekoan, «irmoki» salatu zuten «herriko bost gaztek jasotako epaia», eta beren «elkartasuna» helarazi zieten. «Coviteren salaketaren ondorioz, Espainiako Auzitegi Nazionalera joan behar izan dira, eta ustez, ‘terrorismoa goratzeagatik’ 6 hilabeteko lan behartuetara kondenatu dituzte, haien esanetan, ‘elkarbizitza baloreetan’ sakontzeko», azaldu zuten hasieran.
Eta horren aurrean, salatu zuten, «’terrorismo’ akusaziopean Espainiako Auzitegi Nazionalak epaitzea eta zigortzea zentzugabea eta bidegabea dela». Are gehiago, «herritarrok bakearen eta askatasunaren bidean aurrerapausuak egiten ari garen honetan, batzuk aurreko eszenatokia eta eskubide urraketak betikotzeko ahaleginak egiten ari dira», Ernaien ustez.
Gazteen epaia, «eraso bat»
Horregatik guztiagatik, Ernaien ustetan, «bost gazte hauek jasaten ari diren kondena ez da inongo kasualitate bat, euskaldunoi egotzitako beste eraso bat da, ez baitute adierazpen askatasunez gure herriaren defentsan erori zirenak gogoratzerik nahi». Hau da, «Estatuak, bere gobernua buru duela, jazarpen eta errepresioaren eztabaidan trabatuak nahi gaitu helburu politikoetan aurrera ez egiteko, eta eman ditugun urratsak ezkutatzeko».
Ildo horretatik, Ernaik argi dauka: «gure herriaren historiaren memoria egiteagatik zigortzen gaituzte; beraien bertsioa inposatu nahi dute, herri honek jasan duen errepresio eta sufrimendua ezkutaraziz».
Baina, «aurrera egiteko garaia da, pertsona ororen eskubide oro errespetatu eta errespetaraztekoa», adierazi zuten zorrotz Ernaiko ordezkari eta bertaratutako herritarrek.