Pixkanaka aurrera dijoaz 2017ko Hernani Erabaki aurrekontu partehartzaileen prozesuko proposamenak. Horietako bat izango da, Udalak iragarri berri duen piraguismo ikastaroa. Hain zuzen, nerabeei zuzendutako kirol eskaintza ez konpetitiboa indartzea proposatu zuten, eta hori egingo da ikastaro honekin.
2002 eta 2006 urteen bitartean jaiotako hernaniarrentzat zuzendutako ikastaroa izango da, eta maiatzaren 12an hasi eta ekainaren 16an bukatuko da. Larunbatetan izango dira saioak Fagollagan; hain justu, sei egingo dituzte, 75 minutukoak.
15 euroko kostua izango du ikastaroak, baina saio guztietan partehartzen duten gazteei, osorik bueltatuko zaie kopuru hori.
Dagoeneko eman daiteke izena Gaztelekuan (asteartetik ostegunera, arratsaldeko 17:00etatik 20:00etara) edo Kiroldegian, eta maiatzaren 8ra arte izango dute aukera herriko gazteek.
Maiatzaren 8ra arte izango dute aukera herriko gazteek piraguismo ikastaroan izena emateko.
Oinarrizko teknikak
Ikastaroa hasteko, piraguismoaren oinarrizko teknikak irakatsiko dira, eta sakondu ahala, kirol honetako modalitate desberdinak praktikatzeko aukera izango da. Horietako bat, gainera, itsas kayaka, Ondarretako uretan egingo da.
Ikastetxeetan, inkesta
Esan bezala, Hernani Erabaki prozesuan proposatutakoa da kirol ez konpetitiboak eskaintzeko ideia. Hortik abiatuta, inkesta egin zuten ikastetxeetan, eta piraguismoa izan zen eskaera nagusia. Hau bukatuta, formatu laburreko ikastaro gehiago eskaintzea aurreikusten dute.