Euskal Herriko eta estatuko hainbat txokotan bezala, Hernanin eta Astigarragan ere mobilizazioak deitu zituzten herenegun eta atzo, eta gaur, Iruñean egingo den manifestaziorako deia egin da.
Eguerdiko 12:30etan Iruñeko «Injustizia Jauregitik» aterako direla azaldu du Euskal Herriko Mugimendu Feministak. «Ez da abusua, bortxaketa da. Ez dago gure hitza epaituko duenik», izango da leloa, eta parte hartzeko deia luzatu da.
Jendetza, epaiaren kontra
Ostegunean jakin zen epaia: Nafarroako Auzitegiak 9 urteko kartzela zigorra jarri die 2016ko San Ferminetan talde bortxaketan parte hartu zuten bost gizonei, La Manada deitutakoei. Baina epaiak sexu abusuagatik zigortu ditu, eta, aldiz, sexu eraso delituagatik absolbitu. Gainera, hiru epaileetatik batek boto partikularra eman du, auziperatuak absolbitzeko eskatzeko.
Horrek haserrea eta sumina sortu zuen epaia jakin bezain pronto, eta hainbat mobilizazio egin ziren Euskal Herriko eta estatuko herri eta hirietan, mugimendu feministek deituta.
Hernanin, jendetza bildu zen ostegunean Plaza Berrin, asanbladan eta ondorengo manifestazioan. «Ez da abusua, bortxaketa da!», adierazi zuten garbi. Astigarragan, berriz, atzo egin zuten kontzentrazioa, udaletxeko arkupetan.
Hurrengo deialdiei adi egoteko eskatu dute.
Udalak, «hernaniarren elkartasuna» adierazi dio
Hernaniko Udalak «amorrua eta haserrea» adierazi ditu adierazpen instituzional batekin, eta «erasotua izan zen emakumeari hernaniarren elkartasun osoa» adierazi. «Nik sinesten dizut!».
Guztiaren «erroa bizi garen jendarte matxista» dela dio; «bortxaketaren kultura bat sustatzen ari da eta oso larria da». Horren aurrean lanean jarraitzeko konpromisoa azaldu du.