Etxeko lasterketan ondo pasatzeko prest!

Astearte eta ostegunetan entre­natzen dute, Astigarragako Txi­rrin­dulari taldeko txikienek. Asteazkenekoa, atseden eguna dute, baina neke arrastorik ga­be elkartu ziren egun horretan, Kronikarekin. Are gehiago, se­ku­lako martxarekin! «Oso giro ona daukagu taldean; akaso oso berritsuak gara, hori bai», onartu dute. Elkarri bromak egiten eta txintxatzen pasa du­te elkarrizketa osoa; ondo pa­satzen, elkartzen diren bakoi­tzean egiten duten bezala.

Eta horixe egingo dute gaur ere, zita berezia daukate eta: Txirrindagan Txiki lasterketa izango dute, Astigarragan bertan, txirrindulari alebin eta in­fantilek; 17:00etan hasita, erdiguneko kaleetan barrena: «ilusioa egiten digu, polita da he­rriko lasterketa egitea», diote.

Sekreturik ez, baina tranparen bat akaso...
Ondo ezagutzen dute, lasterketaren ibilbidea: zirkuituari hiru itzuli emango dizkiote, 5 kilometro osatzeko guztira. «Se­kre­turik ez dago, batxeetan kontuz ibili eta gainerakoan de­­na eman». Baina sorpresaren bat prestatuko dutela onartu dute, barre algaraka: «lurrean txin­txetak jartzeko esango di­e­gu herritarrei!». Baina hori ba­ka­rrik ez, animoak ere eskatu dituzte: «gerturatu daitezela gu animatzera, guk dena emango dugu eta!». Uste dute, herrian beste inon baino animo gehiago izan­go dituztela.

Baina ez dute animorik fal­ta, kanpoan aritzen direnean ere: «familiakoak eta lagunak joaten dira, eta taldeko beste bi neskak ere bai. Lasterketetara nesketan ni bakarrik joaten naiz, baina besteak joan izan dira anima­tzera», dio Amets Goi­koetxeak. «Hori bai, Ametsi bakarrik animatzen diote!», erantzun Markel Galarragak.

Animo horiekin, dagoeneko hirutan lortu du podiumera igotzea, Ametsek: «nabaritzen da gero eta neska gehiago ga­rela txirrindularitzan», dio.

Zazpi lasterketa egin dituzte orain arte, eta «gustora» ari dira denak. Baina lasterketetan bakarrik ez, entrenatzen ere ederki pasatzen dute: «Zar­ku­mendegira edo Hernanira joaten gara, normalean bidegorritik, baina batzuetan errepidetik ere bai. Entrenatzaileak batzu­e­tan uzten digu Zarku­men­degira azkar joaten, eta pi­katu egiten gara gure artean», onartu dute. «Asko ari gara ikasten, indarrak neurtzen... Gu denak txikiak gara, eta karreretan bes­te txirrindulariak haundiak!».

Gehienei, familiatik datorkie txirrindularitzarako zaletasuna: aita ibiltzen dela, osaba ibiltzen dela... Errepidean zi­klis­tak ikustean, inbidia sentitzen zuela onartzen du Beñat Auz­mendik, eta «karreterako bizikleta lortzeko» apuntatu zen Aimar Zabala, onartu duenez. Lasterketetan libre sentitzen di­rela, edota bizikletan ibiltzeak zirrara berezia pizten diela ere aipatu dute.

Baina palan, esku pelotan, futbolean, dantzan... Denetik egiten duten arren, garbi daukate, txirrindularitza dela, ge­hien gustatzen zaiena. Horre­gatik, «ondo pasatzera» aterako dira gaur, herriko kaleetan, astigartarren animo artean.

Gainerako kategorietan

Azparren bigarren eta Romero laugarren, Segurako Sarian

Aurreko asteburuan ere, hiru lasterketatan aritu ziren, txirrindulari astigartarrak. Aizar­nazabalen aritu ziren infantilak, zirkuitu motz bezain teknikoan, eta ez zuten lasterketa bukatzea lortu Tasio Sem­pe­re­na eta Aketza Bolado astigartarrek, doblatu egin baitzituzten aurrenekoek.

Oso bestelakoa izan zen he­rritarren partehartzea, kadete mailako Segurako Sarian. 63 ki­lometroko lasterketan, Lier­ni­a­ko gainean hautsi zen, helmugatik lau kilometrora, eta lau laguneko taldetxo bat nabarmendu zen buruan; horien artean, bi astigartar: Enekoitz Azparren eta Jaime Romero. Laukotea buruan iritsi zen az­keneko aldapatxora: Asier Pozo izan zen indartsuena, Azpa­rre­nen aurretik; eta Haimar Etxeberriak hirugarren postua kendu zion Romerori.

Jubenilek, berriz, Gipuzkoa Klasikoa izan zuten Azpeitian, 108 kilometroko ibilbidean, eta 166 txirrindulariren partehar­tzearekin. Telmo Semperenak eguneko ihesaldia hartu zuen, beste zortzi txirrindularirekin batera. 40 kilometroz izan zi­ren buruan, baina Errezilera igotzen harrapatu zituzten, eta tropela hautsi egin zen. Hortik aurrera, Semperenak, atzean geratuta, helmugara kon­trolaren barruan iristea zuen helburu bakarra, Alfonso Silva portugaldarrak irabazi zuen lasterketan.

Eta 23 urtez azpikoek, azkenik, Arabako Duranan izan zuten laster­keta, Lehendakari Torneoko seigarren proba. 148 txirrindulari abiatu ziren, 118 kilometroko ibilbide lauean, eta ziztu batean osatu zituzten Ulibarriko urtegira hiru itzuliak, 49 kilometro orduko ba­tazbesteko abiaduran.

Urko Semperena, esprint bideratzaile lanetan aritu zen, Onditz Urruzmendi taldeburu­arentzat. Zazpigarren izan zen Urruzmendi esprintean, eta 32garren bukatu zuen Sem­pe­renak, lana egin ondoren.

Urretxun, Amurrion eta Idiazabalen, lasterketak
Astigarragan bertan ariko dira, alebin eta infantilak; eta kanpoan, gainerakoak. Kadeteek, Urretxun daukate zita, gaur 16:00etan. Jube­ni­­lak, Amurrion ariko dira gaur, 10:00etan; eta Idia­za­balen bihar, 16:00etan. Eta afizionatu mailakoek, bost lasterketa dauzkate aukeran, aste­buru luzean: besteak bes­te, Lazkaoko Proba etzi, 10:00etan; eta Ando­aingo Santikutz Kla­sika asteartean, 09:30etan.