Gure Esku Dagok erronka berri bat jarri du aurten: Eman eskua etorkizunari lelopean, giza katea egingo du ekainaren 10ean, Donostia, Bilbo eta Gasteiz lotzeko.
Erronka hori lortzeko, gutxienez 100.000 lagun beharko direla aurreikusi da, eta herriz herri zenbat beharko diren kalkulatu da: Astigarragan, 600 lagun inguru. Izenematea irekita dago.
Izena emateko mahaietan, zapi eta autobusa
Hain zuzen, aste honetan bertan hasi dira izena emateko mahaiak jartzen. Ostegunetan, 18:00etatik 20:00etara jarriko dira, eta igandetan, 12:00etatik 14:00etara; aste batean Joseba Barandiaran plazan, eta bestean, Kontxa Etxeberria plazan.
Izena ematerakoan, 5 euroren truke lepoko zapia emango zaio bakoitzari, giza katean lepoan jantzita eramateko eskatuko dena.
Astigartarrek kilometro eta erdiko ibilbidea osatu beharko dute, Usurbildik Aginarako bidean. Bertara joateko autobusak ere antolatu dira, Astigarragatik Aginara joateko, eta izena emateko momentuan eskatu ahal izango da lekua gordetzeko, 7 euroren truke.
Erabakitzeko eskubidea, aldarri
Aurtengo erronka berri honekin, Gure Esku Dagok oinarri dituen hiru printzipioak gogorarazi nahi ditu: «herri bat gara, erabakitzeko eskubidea dugu, eta herritarron gaia da».
Era berean, lanerako prest dagoena gonbidatu dute, harremanetan jartzeko, email berri honen bitartez: gizakatea.astigarraga@gmail.com.