Hernaniko EAJ-PNVk emandako informazioari erantzun, eta «oinarririk gabeko alarma ekidin» nahi izan du Udalak; eta jakinarazi du, «Ave Maria parkeko basoaren zati batean aurkitutako kutsadura maila oso txikia» dela, eta ez duela «herritarren osasuna arriskuan jartzen».
Udalak azaldu du, maiatzaren bukaera aldera izango dituela Udalak, azterketaren behin betiko emaitzak; «baina horrelako albisteek herrian sor dezaketen oinarririk gabeko alarma ekiditeko, ondorio batzuk aurreratzea erabaki dugu».
«Adituek ez dute ikusten neurri prebentiboen beharrik»
Horrela, Udalak azaldu duenez, ikerlariek aurreratutako informazioaren arabera, «adituek ez dute ikusten neurri prebentiboen beharrik».
Jakinarazi du, 2007-2008 bitartean enkargatu eta burutu zuela Udalak, basoaren zati batean kutsadura aztertzeko lana: «orduko azterlanak, metal astunen zantzuak antzeman zituen gune zehatz batean, eta etorkizunean neurketa zehatzagoak egitea gomendatzen zuen. Parkea orduan ez zen publikoa. Ondorioz, herritarren arrisku maila oso txikia zela eta, ez zen inolako neurririk hartu. 2011n, zonalde hori herritarrentzako ireki zen, eta egurrezko pasarela eraiki. Baina nahiz eta publikora zabaldu, kutsadura aztarnak topatutako gunea ez zen herritarren ohiko pasabidea, eta erabilera oso txikia izaten jarraitu zuen.
Orain aurkitutako kutsadura aztarnak, 2008an baino txikiagoak
Udalak gaineratu du, iazko udaran haurrentzako ekitaldiak antolatzen hasi zirela gune horretan, eta arrisku maila oso txikia izanda ere, badaezpada ere neurketa berriak egitea erabaki zuela: «2017ko abenduan enkargatu zuen Ingurumen Sailak, eremu zehatz batean antzemandako kutsadura maila berriro aztertzea. Lur kutsaduran aditua den enpresa batek egin ditu neurketak, eta maiatzaren bukaeran aurkeztuko dizkio emaitzak Udalari. Dena den, enpresak aurreratutako informazioaren arabera, kutsadura aztarnak aurkitu dituzte, baina 2008ko neurketan antzemandakoak baino txikiagoak dira, eta ondorioz, adituek ez dute neurri prebentiboen beharrik ikusten».
Edozein kasutan, Udalak aurreratu du, datuak eta ondorio zehatzak jasotzean, horien berri emango duela; eta horiek kontutan hartuta, zein aukera dauden aztertuko duela.