Ave Maria parkeko basoa itxi dadila eskatu du Hernaniko EAJ-PNVk, «badaezpada ere, prebentzio neurri gisa». Izan ere, Andoni Amonarraiz bozeramaileak adierazi duenez, «apirilaren 17ko Hirigintza Batzordean, jakinarazi ziguten badagoela txosten bat, konfirmatu duena basoaren kutsadura». Horregatik, «beste behin» eskatu dute itxiera: «uste dugu hobea dela prebenitzea, damutzea baino; eta behin neurriak hartuta, eta arazoa konponduta dagoenean, irekiko dugu berriro».
«2009tik 2017ra, ez zen ezer egin arazoa konpontzeko»
EAJk gogorarazi du, 2009tik datorrela gaia: «Eusko Jaurlaritzak parkeko basoaren lurra aztertu zuen, eta jakinarazi zuen kutsatuta zegoela eta azterketa sakonago bat egin behar zela. Baina txosten hori, 2017ko ekainan iritsi zen Hernaniko EAJren eskuetara, eta momentu horretara arte, Hernanin ezker abertzaleak gobernatzen zuen bitartean, ez zen ezer egin horren inguruan», salatu du.
EAJk azaldu du, joan den urtean eskatu zuela «bigarren ikerketa hori egitea, eta basora sarrera mugatzea».
«Martxan jarri daitezkeen ekintzen zain gaude»
Bigarren ikerketa horren txostena da, hain justu, Hirigintza Batzordean aipatu zutena: «EAJren galderei erantzunez, EH Bilduk jakinarazi zuen, txosten hori dagoeneko eginda dagoela, eta baieztatu duela zonaldearen kutsadura. Guri ez digute txostena helarazi, eta martxan jarri daitezkeen ekintzen zain gaude», dio Amonarraizek.
Bukatzeko, hernaniarrei galdera bat luzatu nahi izan die, Hernaniko EAJ-PNVk: «ez luke edozein pertsonak itxiko basoa, epe baterako?».