Gure Geroa Gobernatzeko hitzaldi-sorta eskaintzen ari da EH Bildu Euskal Herrian zehar, alderdiaren eskaintza politikoa azaltzeko. Eta oraingo honetan, Hernanin egingo dute geldialdia, bihar. Arratsaldeko 19:00etan izango da, Biteri kultur etxean.
Hainbat gai, mahai gainean
«Une politiko berezia bizitzen» ari garela dio EH Bilduk, eta horren aurrean, «ireki diren katebegiei erantzuna» emango die Arnaldo Otegik bihar.
Horrela bada, estatu politiko berriaz arituko da, eta bereziki, Autonomiatik subirautzara dokumentuaz. Baina baita pil-pilean dauden beste hainbat gaiez ere; hala nola Kataluniako egoeraz, pentsiodunen borrokaz, mugimendu feministaren azkeneko ekintzez... Horrez gain, bertaratzen direnen galderak erantzungo ditu.