Bihar bilduko da Hernaniko Udaleko plenoa, arratsaldeko 19:00etan hasita, udaletxeko pleno aretoan. Guztira, 11 puntu izango dituzte lantzeko, eta horietako bi, dagozkio 2017ko aurrekontuaren likidazioari. Aurrena, likidazioaren emaitzaren berri emango dute. Positiboa izango da, eta ia 4,5 milioiko gerakina izango du: 4.449.706 euro Udalak, 64.140 euro Ereñotzuk, eta 797 euro Zerbitzu Sozialek. Hiruen kasuan, likidazioak betetzen ditu «egonkortasun eta finantza iraunkortasun irizpideak».
Udalak, 25.714.326 euroko aurrekontua izan zuen 2017an, eta sarreren %108a eta gastuen %90a exekutatu ditu. Diru sarrerak haundixeagoak izan dira, «batez ere, enpresen zenbait zerga likidatu direlako», azaldu dute. Eta gastu gutxiago egitearen arrazoia da, «beste urteetatik zetozen partida batzuk doitu direla». Jakinarazi dute, gainera, %4,36ko zorra duela Udalak (1.449.645 euro), «Gipuzkoako udalerrien batazbestekoaren oso azpitik (%16,2)».
Gerakina, aurten proiektuak hobetu eta berriak gehitzeko
Eta plenoko hurrengo puntuan eztabaidatuko du plenoak, zer egin ia 4,5 milioi euroko gerakinarekin. Udal Gobernuaren proposamena izango da, 2018ko aurrekontuan txertatzea, dagoeneko jasota dauden hainbat proiektu hobetzeko, partidak haundituz; eta aurrerago egingo diren beste zenbait proiektu berri bideratzen hasteko. Maiatzeko plenoan emango du horien berri.
Udal Gobernuak adierazi du, emaitza horrek islatzen duela, diru publikoa «zentzuz eta arduraz» kudeatzen ari dela, eta «sortzen diren baliabide guztiak herritarren beharrak asetzeko» erabiltzen direla.
Biharko plenoaren aurretik, Tokiko Gobernu Batzordea bilduko da gaur, 09:00etan; eta Hirigintza eta Ingurumen Batzordea bihar, 18:00etan.