Festa giro polita jarri zuten atzokoan, Hernaniko kaleetan barrena, dantzari txikiek. Ttarlako gaztetxoak izan ziren, Dantzari Festaren larunbatari bere dantza saioak eskaintzen aurrenekoak, goizean; eta Gipuzkoa eta Lapurdiko makina bat herritatik gerturatu ziren arratsaldean, herriko kaleetan dantzari aritzeko.
Eta polita izan bazen atzokoa, ez da gutxiago izango gaurkoa, Dantzari Festaren egun nagusia: euskal dantzen mapa osatuko dute Hernanin. Izan ere, Euskal Herriko zazpi probintzietako dantza taldeak etorriko dira: Gipuzkoatik, Hernaniko Ostargi, Musika Eskola eta Ttarla, Azpeitiko Ikasberri, Errenteriako Ereintza, Donostiako Eskola, Goizaldi eta Trebeska, Irungo Ibarla-Meaka eta Kemen, eta Oiartzungo Olarri; Arabatik, Gasteizko Adurtza; Bizkaiatik, Bermeoko Alkartasuna eta Barakaldoko Laguntasuna; Nafarroatik, Iribaseko Basakaitz, Elizondoko Baztandarrak eta Iruñako Ortzadar; Nafarroa Behereatik, Donibane Garaziko Garaztarrak; Lapurditik, Donibane Lohizuneko Begiraleak eta Miarritzeko Oldarra; eta Zuberoatik, Barkoxeko dantza taldea.
Kalejiran aurrena, eta Plazako ekitaldia gero
Herriko kale eta auzoetan sakabanatuta ibiliko dira aurrena, kalejiran eta dantza saioak eskainiz, 10:45etan hasita. Eta ondoren, Plazan elkartuko dira denak, 13:15etan, ekitaldi nagusia eskaintzeko: agintari dantza, gurra, muxikoak, fandangoa eta arin-arina, eta larrain dantza. Festa borobiltzeko, Atsegindegin bazkalduko dute dantzari eta musikariek; eta ondoren, omenaldia eta erromeria izango dira.