Plaza polita bezain jendetsua izan zen atzokoa, Jauregin, Roxario Pikabea eta Jon Arizmendiren arteko apustuan. Eta 375 ikusleren aurrean, ereñotzuarra nagusitu zen, nabarmen nagusitu ere: sei minututik gorako aldearekin bukatu zituen bere lanak.
Aizkoran izan zen estuagoa lehia. Aurretik ekin zion andoaindarrak, aurreneko bi enborrekin; baina hirugarrenerako, buelta eman zion Pikabeak, eta aldea hartuta, indarrak neurtuz bukatu zituen sei enborrak. Minutu bateko aldearekin hasi zen korrika saioan, ikusleen animo eta gomendio artean.
Eta horretan, ez zen lehia haundirik izan. Hasieratik ikusi zitzaion errazago ereñotzuarrari, eta aldea haunditu besterik ez zuen egin, zazpi kilometroetan zehar.
Azkenean, 57:51 denboran bukatu zituen lanak Pikabeak, eta 1:03:58 markarekin Arizmendik. Txapela jantzi zioten, baina 800 euroak ere poltsikoratu zituen!