Zubiri eta Barrenetxea IV elkarren aurka, finalerdian

Sagardoaren Txapelketaren finalerdiak gaur jokatuko dira Galarretan eta Barrenetxea hernaniarra eta Zubiri goizuetarra elkarren aurka ariko dira bigarren finalerdian. Aurretik lehendabiziko final­erdia jokatuko da eta bertan Urriza eta Garces (Guru­tzeta), Juanenea eta Endika (Larre Gain) neurtuko dira. Urriza eta Garcesek partidu guztiak irabazi zituzten ligaxkan eta zuzenean sartu ziren finalerdietan.
Bigarrengoan Segurola eta Barrenetxea (Oialume Zar), Uterga eta Zubiriren (Altzueta) kontra ariko dira. Segurola eta atzelari hernaniarra sailkatu ziren zuzenean finalerdietara, hauek ere beraien hiru partiduak irabazita.
Sagardotegiei dagokionez bi hernaniar; Altzueta eta Larre Gain eta Astigarragako beste bi; Gurutzeta eta Oialume Zar daude azken aurreko fasean.
Ostegunean egin zituzten pelota aukeraketak bikote bakoitzak. Printzipioz hautagai nagusiak finalera iristeko orain arte partidurik galdu gabeko bikoteak dira, baina urdinak maila haundiko bikoteak dira eta jokuz daude gainera; batez ere Endika eta Uterga.
Beraz lehia estua ikusiko da gaur Galarretan finalaren bila.  Pasa den urtean Larre Gain finalera iritsi zen Urriza eta Azpirozekin. Aurtengo zortzi pelotarietatik bakarrak du finala errepikatzeko aukera, Urrizak, baina Iruñako aurrelariak ere finala galdu zuen. Beraz aurten txapeldun berriak izango dira. Hala ere, horretarako aurretik finalerdiak gainditu beharko dituzte eta hernaniar bat eta goizuetar bat daude hautagaien artean.