Udaberriarekin batera, Udaleko egunerokotasunaren barruan sartu ohi da urtero aurreko urteko ekitaldia, eta hala jakinarazten dute likidazioaren zenbatekoa. Besteak beste, horretarako deitu zuen Astigarragako Udalak ez-ohiko Plenoa astearterako.
2017ko ekitaldia ixtea izan zen landu zuten aurreneko gaia; horren arabera, ia 5 milioiko gerakina izan du Astigarragako Udalak, eta hortik, 3.187.449,13 euro txertatzea kreditu gehigarri bezala, inbertsioetarako, eta 1.351.791,96 euro gastuetarako, kreditu aldaketaren bidez.
Kezkatuta jaso zuen kopurua EH Bilduk, bertan adierazitakoaren arabera: «inbertsioen %38a besterik ez da gauzatu, 2004tik, herri honek izan duen kopuru baxuena da», adierazi zuen Andoni Gartzia bozeramaileak.
Jon Arregi Ogasun zinegotziak esan zion ulertzen duela kritika, «eta datozenetan gertatu ez dadin, neurriak hartuko ditugu».
15 egun, inbertsioen emendakinetarako
Inbertsioetarako proposamena egin du Udal gobernuak, eta hasierako onarpena eman zion Plenoak, EAJren eta PSE-EEren aldeko zazpi botoekin. EH Bildu, aldiz, abstenitu egin zen, eta «hitz egiteko prest» azaldu zen. Izan ere, akordioetarako, eta proposamen horri emendakinak aurkezteko, hamabost eguneko epea izango da.
Proposamen horretan, Zorione Etxezarraga alkatearen esanetan, «hezkuntzaren gaia aipatu behar da: Haur Eskolaren lokala erostea dago, jangela haunditzeko partida, edo eskolaren mantenua egiteko...». Dena den, azaldu zuen: «proposamenak alor gehienak ukitu nahi ditu, herritarrei modu zabalean eragiteko».
Oposiziotik, EH Bildu ez zen ados azaldu: «Badaude adostasunerako proposamen batzuk, aurrekontuen emendakinetan ezezkoa jaso zutenak; beste batzuk, aldiz, zalantzak sortzen dizkigute, hala nola sagardotegietako autobusak, radarrak...».
Bereziki zalantzan jarri zuten Obra eta Zerbitzuen departamenturako proposatutako aholkulari lanpostu bat: «30 urtetan ez da behar izan».
Beste gai eztabaidatsua
Bere garaiean eztabaidatsua izan zen beste gai bat jarri zuten mahai gainean: mozioen onarpena baldintzatzeko proposamena. Mozio batek kontu ekonomikoak baldintzatuko balitu, proposamenaren inguruko kontu-hartzailearen txostena izatea mahai gainean izatea proposatu zuen Udal gobernuak irailean.
Mikel Duran PSE-EEko zinegotziak zalantza juridikoak aipatu zituen, «hautetsien eskubideak mugatzen zituelako», eta txosten juridikoa eskatu zuen. Horren arabera, baldintzatu dezakeela ondorioztatu da: «berretsi egin da EH Bilduk eta PSE-EEk esandakoa», adierazi zuen Gartziak.
Horren aurrean, Etxezarragak esan zuen helburua ez zela «parte-hartzea mugatzea», eta beraz, «onartu eta bete» egingo dutela. Hortaz, aho batez onartu zuten hasierako proposamena bertan behera uztea.
Aho batez, beste hainbat gai
Dena den, gai guztiak ez ziren eztabaidatsuak izan, eta aho batez onartu ziren: kontratazio-mahaiaren osaketa, lanpostu zerrenda, Pagoaga Plan Berezia behin betiko ezeztea, eta Amaia Agirregabiria eta Iker Rocandioren aldeko mozioa.
Onartu ziren, baita ere, nahiz eta adostasun totala ez lortu: Udaltzaingoaren araudi berria (EH Bildu abstenitu egin zen); EAJ eta PSEren pentsioei buruzko mozioa (EH Bildu abstenitu egin zen); Kataluniako atxiloketen inguruko EH Bilduren mozioa (EAJk abstentzioa, eta PSE-EEk, kontra).
Txosnen gaia, galderetan
Galderen txandak itxi zuen ez-ohiko Plenoa, eta txosnen gaia izan zen eztabaida piztu zuena: «gure kontrakotasun osoa izango duzue», esan zuen Gartziak. Etxezarraga alkateak adierazi zuen, «bizilagunei urtebeteko atsedenaldia ematea» erabaki dela, eta gaia jorratzeko Jai Batzordea deituko dutela.
Udala prentsa-oharra
Hezkuntza arloa, onuradunena inbertsioen proposamenean
Udal gobernuak dio «ahalik eta arlo gehien hornitzea» izan dela helburua inbertsioen proposamena egiterakoan.
Esan bezala, 2017 ekitaldiko likidazioa egitea izan zen astearteko ez-ohiko Plenoko zeregin nagusietako bat. Eta horrekin batera, Udal gobernuak gerakinaren txertaketarekin egingo lituzketen inbertsioen proposamena helarazi zuten.
Hasierako onarpena eman zioten proposamenari, Udal gobernuko EAJren 6 botoekin, eta PSE-EEren zinegotziaren babesarekin. EH Bildu abstenitu egin zen, baina akordio bat adosteko, mahaiaren bueltan eseritzeko prest dagoela argi utzi zuen.
Arlo gehienak, kontuan hartuta
Plenoaren aurretik eman zuen Udal gobernuak bere proposamenaren berri: «udal arlo gehienak kontuan hartu ditugu inbertsio-plana egiterakoan». Zentzu horretan, inbertsioak zuzenduko dira «kirolaren arlora, herriko mantenura, berdintasuna, hondakin-bilketaren informazio zerbitzura, parke eta plazen errehabilitaziora...».
Dena den, eta Zorione Etxezarraga alkateak Plenoan bertan azaldu zuenez, arlo onuradunena hezkuntzarena izango da: «nahiz eta egungoak ez daukan leku-arazorik, Kontxa Etxeberria plazako Haur Eskola berriari 400.000 euro eskainiko zaizkio». Horrez gain, «Herri Eskolaren jangela txikiaren haundipenarentzat 200.000 euro zuzenduko dira, eskola komunitateak eskatu duenari segika».
DBHko eraikina ere, inbertsioen proposamenean dago: «egungo 80.000 euroak, 130.000 euro izango dira», azaldu dute. Arlo honekin bukatzeko, «partida berri bat izango da Astigarragako hezkuntza-beharrak aztertzeko».
Hezkuntza beharrak aztertzeko txostena egingo da.
‘Murgiazpi’, kultur etxe berria
Bestalde, Kultur Etxe berriaren gaia ere landu dute. Murgiazpi izenaren alde azaldu da Udal gobernua, kultura teknikariak proposatutakoa.
Bere garaian hainbat bilera egin zituen Udal gobernuak elkarte eta taldeekin proiektua azaldu eta proposamenak jasotzeko, eta hala sortu da kultur etxe berria. Udal gobernuak eskatu du inauguratzeako, erdisotoa antolatzerako obra eginda egotea.