Martxoko plenoan onartu zuen Hernaniko Udalak, kale garbiketa zerbitzuaren publifikazioa, EH Bildu eta Orain Hernaniren aldeko botoekin. Eta horren inguruko xehetasunak eman zituzten atzo, Luis Intxauspe alkateak eta Koro Etxeberria zinegotziak.
«Maiatzaren 9an hasiko da Udala, zerbitzu hori ematen; ez zuzenean, Garbitania enpresa publikoaren bitartez baizik», azaldu zuen Intxauspek. «Udal Gobernu honen konpromisoa izan da, zerbitzuak esku publikoetara pasatzea. 2018ko urtarrilean, poligonoetako hondakinen bilketa publifikatu genuen, eta honekin, beste urrats bat eman dugu».
Orain, FCC enpresak egiten du kale garbiketa, eta alkateak azaldu zuen, «Udalak daukan kontraturik garestiena» dela, 1.152.000 eurokoa. «Gaia aztertzeko konpromisoa hartu genuen, eta 2017tik aritu gara horretan. Langileria aztertu dugu, sindikatuekin elkartuz, beraien egoera eta eskubideak bermatzeko. Eta subrogatu egingo dira langileak, FCCtik Garbitaniara pasako dira, eta lanpostu, jardun eta baldintza berak izango dituzte. Zerbitzua berbera izango da, eta gerora, bai aztertuko dugula, aurrera begira nola hobetu dezakegun», jakinarazi zuen.
«Helburu bakarra izango da, herritarrei ahalik eta zerbitzu onena ematea»
Etxeberriak nabarmendu zuen «abantaila asko» izango dituela publifikazioak: «kale garbiketaren eskumena bereganatu du Udalak, eta hori esku publikoetan egoteak, ahalbidetuko du zerbitzua hobeto eta errazago bideratzea». Era berean, azaldu zuen zerbitzua enpresa pribatuen esku egonda, «etekin ekonomikoa» bilatzen dela; eta orain, esku publikoetan dagoenean, helburu bakarra izango dela «herritarrei ahalik eta zerbitzu onena ematea». BEZa aurreztuko dela (115.200 euro), edota koordinazio hobea izango dela, Garbitaniarekin lanak aurreikusiz, aipatu zituen abantailen artean, baita ere.
Eta langileen egoera, azkenik: «beraientzat hobea izango da, egonkortasuna edukiko dute. Orain arte, kontratazioa lortzen zuten enpresaren menpe zeuden, batetik bestera aldatuz. Orain, Garbitaniako langile izango dira».
Etxeberriak nabarmendu zuen, bukatzeko, ez dituztela «arrazoi ekonomikoak soilik» hartu kontuan, erabakia hartzeko garaian: «beste arrazoi garrantzitsu asko daude».