Estraditatu egin dute Ugaitz Errazkin preso hernaniarra, Frantziatik Espainiara. Atzo eguerdian jakinarazi zuten bere gertukoek, eta arratsaldean iritsi zen Madrilera. Gaur goizean eramango dute Au-dientzia Nazionalera.
Errazkin estraditatu dute presoekin lotutako hainbat ekimen izango direnean, Hernanin eta Euskal Herrian. Gaur bertan, Etxerat elkarteak jarri du zita, arratsaldeko 19:00etan, Biterin: Kinkea egitasmoa aurkeztuko dute, presoen abokatu eta mediku gastuak bermatzeko laguntza kanpaina.
Aurkezpenean izango dira, Urtzi Errazkin elkarteko bozeramailea, Aiert Larrarte abokatua, eta Fernando Arburua psikologoa, Jeiki Hadi medikuen taldekoa. Herritar guztiei irekia da aurkezpena, eta bertan argituko dute, edozein galdera edo zalantza.
Hainbat zita, datozen bi asteburuetan
Igandean, berriz, Gari eta Baldoren aldeko kantu bazkaria antolatu du herritar talde batek, 14:30etan Xalaparta elkartean. Txartelak salgai daude oraindik, Onddi eta Txili tabernetan, 22 euroan. Aurretik, 12:30etan abiatuko dira kalejiran, Dantzari Festarekin elkartzeko.
Aurreko egunean izango da, aldiz, Bilboko manifestazioa, Bada garaia, presoak kalera lelopean. La Casillatik abiatuko dira, 17:30etan; eta bertara joateko, autobusa antolatu du Ezker Abertzaleak, 15:30etan Atsegindegitik. Garinen dago apuntatzeko zerrenda.
Eta Garinen bertan apuntatu daiteke (10 euroan), baita ere, apirilaren 28an Castellon I espetxera egingo duten gazte martxako autobuserako: «bada garaia, gazteok preso eta iheslarien aldeko borrokan lehen lerroan kokatzeko», diote.