Bilboko manifestaziora deia eta autobusa, Ezker Abertzaleak

Taldeko argazkia egin zuen atzo, Hernaniko Ezker Aber­tza­­leak, dei egiteko hernaniarrei, larunbatean Bilbon egingo den manifestaziora joateko. Auto­busa ere jarri dute, 15:30etan Atsegindegitik, eta Garinen dago apuntatzeko zerrenda. 17:30etan abiatuko da manifestazioa, La Casillatik.
«Preso Politikoen Nazioar­teko Egunaren markoan, azpimarratu nahi dugu euskal preso, errefuxiatu eta deportatuen izaera politikoa; beraien borroka, konpondu gabeko ga­tazka politiko bat egon delako eta dagoelako, eta gatazka ho­rretan modu ezberdinetan par­te hartu dute presoek. Erreali­ta­tea, kontzeptuak eta beren esanahiak maneiatu eta itxuraldatu nahi diren garai ho­ne­tan, Bilboko kaleak bete be­har ditugu berriro, izaera politiko hori aldarrikatzeko», dio Ezker Abertzaleak.
Nabarmendu du, gauza as­ko gertatu direla azkeneko bi urteotan: «batzuk positiboak, ga­tazkaren ondorioen konponketa integralerako marko bat eraikitzeko emandako pau­so­ak, eta EA eta EPPKren ekarpenak eta inplikazioa; eta beste batzuk mingarriak, Kepa del Hoyo, Belen Gonzalez eta Xa­bier Rey presoen heriotzak».
Modu berean, adierazi du «Estatuak edozein aurrerapen oztopatzeko ezarritako blokeo eta zailtasunen gainetik», erresoluzio markoa eraikitzen ari dela: «estatu frantsesean elka­rrizketa bide bat ireki da, orain arte izandako inmobilismoa haustea lortuz, Euskal Herritik hurbilago dauden espetxeetara aldaketak eginez. Hego Eus­kal Herrian, aurrerapenak man­tsoagoak baina sendoak dira, eta badago adostasun bat eragile politiko, sozial eta instituzionalen artean, gai urgenteen inguruan», adierazi du.
Eta gaineratu du, legedi arruntaren bidea egiteko konpromisoa hartu zuela EPPKk, eta bide hau inplementatzen ari direla jada espetxeetan: «baina estatu espainiarrean eraginkorra iza­teko, ezinbestekoa da lehen gradu penitentziarioari buka­e­ra ematea; gainditu beharreko aurreneko traba. Estatua esku­bide horretara bidea trabatzen saiatuko da; baina traba hori­ek, herri gisa batuko gaituen arma po­li­tiko bilakatu behar ditugu, bakea, askatasuna eta elkarbizitza lortzeko».