Duela lau urte egin zuten festa Hernanin, hezkuntzaren inguruan; eta aurten ere antolatuko du Hernaniko Hezkuntza Plataformak: maiatzaren 19an izango da, hiru gunerekin; Tilosetan, Plazan eta Atsegindegin, bakoitza bere izaerarekin.
Eta festa antolatzen hasteko, gaur jarri du aurreneko zita, Hezkuntza Plataformak: bilera egingo dute, arratsaldeko 17:00etan hasita, Biterin. Bilera irekia izango da, «eskola desberdinetakoez gain, antolaketan parte hartu nahi duen edonorentzat. Denon laguntza behar dugu, ideiak proposatu eta horiek aurrera eraman ahal izateko», animatu dute.
Jakinarazi dute, gainera, marrazki erakusketa ere izango dela festan, haur gehienen parte hartzea bilatzeko. Eskoletan egingo dituzte, eta zehaztu dute gaia: Nolako eskola nahi nuke? edo Zertan aldatu/hobetuko nuke nire eskola?