Haur Eskolako lokal txikia erostea erabaki zuen Udal gobernuak martxoaren 28ko Tokiko Gobernu Batzordean. Erabaki horren balorazioa egin du EH Bilduk prentsa-ohar bidez: «berri ona izan da, zalantzarik gabe. Hamaika bider errepikatu ondoren, EAJk erabaki zentzudunena hartu duela uste du EH Bilduk. Hala ere, EH Bilduk ohartarazi bezala, aurrekontuan dirurik ez dagoenez 4 hilabetez luzatu behar izan du udalak kontratua eta 4.000 euro gehiago ordaindu beharko ditu».
Orain arte, alokairuan izandakoa
2015ean, EH Bildu udal gobernuan zegoenean, Udalak Herri Eskolaren espazio arazoa konponduko zuen lokal txikia alokatu zuen. Erosketa eskubidea barne hartzen zuen kontratua onartu zuten orduan, hortaz, «hilean 800 euro ordaintzea aurreikusten zuen kontratuak, eta hiru urteetara lokala erosiz gero, aurretik hilero ordaindutako guztia deskontatzeko aukera zegoen».
EH Bilduk dio hasieratik argi izan duela «behin-betiko haur eskola, promotoreak Urumea Berrin Udalari eman beharreko lokalean finkatu behar zela, baita alokatutako lokala erosi behar zela ere». Azken hau, «gurasoen esku egongo litzateke ludoteka bat egokitzeko; edo bestela, XaguXarren egoitza hemen kokatu ahal izango litzateke».
EAJ, kontratuaren berri
EH Bilduk dio EAJk betidanik izan duela kontratuaren berri: «EAJk abenduan aurkeztutako 2018ko aurrekontu proiektuan lokala erosteko partidarik ez zegoela ikustean, EH Bilduk abenduaren 22an aurkeztutako 27 emendakinetako bat lokala erosteko partida bat gehitzea izan zen. EAJk, urtarrila hasieran, emendakina baztertu zuen lokala erosteko beharrik ez zegoela argudiatuz». Horrez gain, guraso taldeek ere aurkeztu zuten erreklamazioa: «EAJk bi urte barru erosteko aukera hausnartzen ari zirela aipatu zuen.
«4.000 euroko kostu gehigarri hau EAJren proiektu ezaren ondorio argia da. Onartezina da ingurukoek behin eta berriz ohartarazita ere, EAJri bost axola izan izana guztiak», salatu du alderdi abertzaleak. Eta gehitu dute: «EH Bilduk proposatutako guztiari ezetz esatea da EAJren helburu bakarra. EAJren obsesio hau dagoeneko kalte nabariak sortzen ari da».