Bi zita izan dituzte Hernaniko arraunlariek, asteburu honetan. Batetik, Pasai Donibanen, Gipuzkoako Batel Txapelketa jokatu dute, Hernaniko bost batelek. Sailkatze estropadetan, fin ibili ziren mutil infantilak, eta finalera sailkatzea lortu zuten; baina final horretan, ordea, laugarren postuarekin konformatu behar izan zuten.
Haur eta promesa mailetako neskek, berriz, kontsolazio finalak jokatu zituzten, Federazio Saria lortzeko lehian; eta bietan nagusitu ziren!
Absolutu mailako nesketan, berriz, kontsolazio finalik ez zen jokatu, eta beraz, final nagusitik kanpo egonda, Zumaiara jo zuten hernaniarrek, igandean. San Telmo Saria jokatu zen bertan, baina ez bateletan, trainerilletan baizik. Eta ederki aritu ziren. Zumaiako trainerillarekin aritu ziren, txanda berean, eta aurrea hartu zien hernaniarren Oindi ontziak. Beste txandako biek, San Juanek eta Oriok, bere denbora hobeto zuten; eta beraz, hirugarren bukatu zuen San Telmo Saria, Hernanik.