Extremadurako jardunaldiak gaur hasiko dira, 19:30etan Biterin Ezequiela Albarrán García irakasleak emango duen hitzaldiarekin: Extremadurako eta Maltraviesoko kobazuloko aurreneko biztanleak izango ditu hizpide.
Bihar, berriz, Extremadurako zapore eta usainak irisiko zaizkie hernaniarrei. 26garren edizioa da aurtengoa eta urtetik urtera Extremadura hurbiltzen da Hernanira asteburu batean. Gaurko hitzaldiaren ostean, bihar 10:00etan hasita Atsegindegin, Extremadurako jaki gastronomikoen festa egongo da; probatu, dastatu eta erosteko aukera izango da.
Postuak jarriko dituzte, bertako gastronomiarekin eta informazio turistikoarekin. Pintxoak eta ardoa ere izango dira aukeran.
Goiz osoan egongo dira bertan, eta ondo girotuta, gainera. Musikak ez du etenik izango, Extremadurako jotekin eta kantu tipikoekin, eta dantza ere ez da faltako: Gainera, 13:00ean, Virgen de Guadalupe taldeko koru eta dantzariek emanaldia egingo dute.