Kaxkoko aldapak patinetan ibiltzeko pistak bihurtuko dira gaur gauean. Izan ere, Gazte Olinpiadetako bigarren proba eguna da gaurkoa, eta patin lasterketan lehiatu beharko dute taldeek.
Proba bera gaueko 22:00etan hasiko da, Andre Kalen, Putzueta harategiaren parean, baina lehenago prest egon beharko dute taldeek, 21:30etan, Plaza Berrin.
Patin, arrautza eta asmakizun
Probaren muina patin lasterketa izango bada ere, ez da hori izango, gaurko eginbehar bakarra.
Talde bakoitzeko bi lagunek hartu beharko dute parte, eta lau taldeko txandatan ariko dira lehian.
Andre Kaletik, Putzueta harategi paretik gora hasiko dira, Pitxitxuloraino, eta han bikotea banandu egingo da. Partaide batek asmakizun bat asmatu beharko du, eta ondoren, Garinera joan. Beste taldekideak, berriz, Andre Kale igo eta Kale Nagusia jaitsi beharko du, handik Garin tabernara iritsi eta taldekidearekin elkartu arte.
Behin biak elkartuta, Tilosetako eskaileretan gora frontoira joan beharko dira, bigarren proba egiteko: arrautzaren jolasa. Frontoiaren alde banatan marra bat jarriko da, eta taldekide bakoitzak alde batetik bestera pasa beharko du, arrautza daramakien goilara ahoan daukala. Hau egindakoan, Plaza joan, eta Kale Nagusitik behera Garineko helmugara joango dira. Bikote bakoitzetik azkena iristen denaren denbora hartuko da kontuan.
Txanda bakoitzetik bat pasako da finalera, eta bertan, ibilbidea taldekide bakarrak egingo du, tarteko probak egin gabe. Ipurdiko gehien hartzen duenak punturik bilduko ote?