Ume lapurtuen kasuen inguruan hitz egingo da gaur, 19:00etan hasita, Biteri kultur etxean. Hain zuzen, umea lapurtu zietela susmoa duten bost protagonistek kontatuko dituzte kasu pertsonalak.
Hiru seinale, susmoa pizteko
Larunbateko Kronikan argitaratutako erreportajean kontatu zutenez, hiru seinalek piztu zieten susmoa Mertxe Aizpurua zumaiarrari, Andone Elizondo errenteriarrari eta Lourdes Ocariz donostiarrari: gurutze potenzatuak, ‘barrutik egin gabe jaiotako haurra’ izan zela kontatu izanak eta ‘ospitalea guztiaren kargu egingo’ dela esan izanak.
Ahizpa eta semeak lapurtu zizkietela diote, hurrenez hurren, hirurek, eta detaileak emango dituzte gaur, beste bi protagonistekin batera. Asmoa, garbia: «Eskatzen duguna da ume adoptatuek DNA probak egitea; horrela lagunduko digute jakiten egia». Eta horrela lortuko dute, baita ere, «ez gehiago gertatzea».