Larunbatean jokatu zuen Oier Gurutzealdek GRAVNI txapelketako hirugarren jardunaldia Iparralderen kontra, eta irabazi egin zuen, 40-23.
Horrek, txanpa bat aurrera egiteko aukera eman, eta aurreneko postuan sailkatzea ahalbidetu du, nahiz eta, partidu bat gehiagorekin izan, Errioxa erretiratu izanagatik.
Araba, hurrengo aurkaria
Gurutzealde astigartarra Gipuzkoa ordezkatzen ari da GRAVNI txapelketan eskuz banaka, trinkete modalitatean. Dagoeneko hiru jardunaldi jokatu ditu, eta igandean izango du laugarrena, Ligaxkako azkenekoa. Mikel Rafael arabarra izango du aurkari, Gasteizko Astronomos trinketean. Goizeko 10:00etan hasita izango da, eta hirugarren partidua izango da berea.
Finalerako txartela jokoan, igandean
Partidu garrantzitsua izango da, izan ere, finalerako txartela izango dute jokoan; irabazten duena taldeko lider bilakatuko da, eta beraz, zuzenean finala jokatuko du. Aldiz, galtzen duenak, finalerdia jokatuko du, hirugarren postuan geratzen denaren aurka.