Martxoaren 8an inauguratu zuen Pino Vicedo aranoarrak, Maisuenean, Amalurraren eskuak erakusketa; eta orain, Kontsejun dago ikusgai, martxoaren 30era arte.
«Emakumeen Egunerako egindako erakusketa izan da, emakume langilearen inguruko lanak dira», azaldu du Vicedok.
Arkatzez egindako marrazkiak dira denak, eta horietan, ikusten da emakumea eskuekin ura edaten, eskuetan haurra duela, eskuekin lana, eskuetan zigarroa hartuta, eskuetan txita duela...
«Horietako batzuetan, barrez ageri da. Makurtuta baina burua altxata. Emakumea beti izan da dirudiena baino gehiago. Eta burua tente izateko arrazoiak dauzka. Barrez ageri den marrazkiek, irudikatzen dute, hainbeste lan egin ondoren, gure momentua dela, indarra daukagula barre egiteko», azaldu du Vicedok. Erakusketaren izenak, berriz, aditzera ematen du «emakumearen eta lurraren arteko konexioa».
Hiru hilabeteko lana izan da: aurrena, argazki periodistikoak bilatu eta aukeratu, eta ondoren, arkatzez kopiatu; 30-40 ordu behar izan ditu, marrazki bakoitza egiteko.
Hurrengo erakusketa, urari buruzkoa
Tatuatzailea da Vicedo, eta ondo datorkio marraztea, «teknika hobetu eta eskua hartzeko». Aurreneko erakusketa izan du hau, eta beste herri batzuetara eramango du gero. Baina buruan dauka bigarrena: «urari buruzkoa izanen da», aurreratu du.