Haurrei zuzendutako pelikula bat jarriko dute gaur, arratsaldeko 17:00etan hasita, Astigarragako kultur etxean: Hurrak eta lapurrak II, euskeraz. Filmaren bigarren zati honetan, parkea salbatzea izango dute misioa, pelikulako protagonista diren animaliek.
Izan ere, beraien bizimodu lasaia okertu egingo zaie. Liberty Parkeko animaliak ederki bizi dira, fruitu lehorren dendako sotoan; jatekoa soberan daukate eta. Baina bat-batean, denda lehertu, eta parkera jo beharko dute, janari bila.
Arazoa da, herriko alkateak jolas-parke bilakatu nahi duela Liberty Park. Orduan, Surly urtxintxak eta parkeko animaliek, elkarrekin egin beharko diete aurre obrei, eta alkatearen erasoei. Gainera, alkatearen alabak Precious bahituko du, Surlyren lagun onena, eta bera salbatzera joango da. Parkera bueltatzen direnean, ordea, jolas-parkea martxan egongo da dagoeneko. Beraz, orain inoiz baino gehiago, elkarrekin borrokatu beharko dute, parkeko animalia guztiek, parkea berreskuratu eta alkatearen hatzaparretatik ihes egiteko.
Cal Brunkerrek zuzendu du film umoretsua, eta ordu eta erdiko iraupena dauka.
Sarrerak kultur etxean salgai, 2 euroan
Pelikula ikusteko sarrerak, kultur etxean bertan egongo dira salgai gaur, saioa hasi baino ordubete lehenago, 2 euroan.
Jakinarazi dute, gainera, gurasoen ardura dela haurrak bertan bakarrik uztea, eta aretoan dagoen langilea ez dela arduratzen beraien zaintzaz.