Ttarla Dantza Taldeak 25 urte betetzen ditu aurten, herriko kaleetara euskal dantzak eramaten. Hain zuzen, 1993an sortu zuten dantza taldea, eta hori ospatzeko, asteburu osoko egitaraua antolatu dute gaur eta bihar zortzirako.
Emanaldia, hasteko
Ostiraleko emanaldia izango da ospakizunei hasiera emango diena, gaur zortzi. Ttarlak 25 urte dantzan ikuskizunarekin, oholtza gainean egingo dute bat dantza taldean aritutako lau belaunaldietako kideek.
Gaueko 22:00etan hasita izango da hori, kiroldegiko frontoian. Eta ikuskizun berezi honetaz gozatzeko, duela aste batzuk jarri zituzten salgai sarrerak Txili eta Garin tabernetan, 6 euroan.
Egun osoko egitaraua, larunbaterako
Hurrengo egunerako, egun osoko festa antolatu dute, Tilosetan. Goizean, 11:30etatik aurrera, Kanika taldearen jolasak, Apaxi kontalaria eta bazkaria izango dira. Arratsaldez, 17:00etatik aurrera, erromeria eta tailerrak izango dira.