ZER izango litzateke Joko Olinpiko bat ikusentzunezko jarraipenik gabe? Hernaniko Gazte Olinpiadetan ere jarraipena egiten da, Olinpik News saioaren bidez; aste honetan hasiko dira. Hori bai, aurretik lan taldea osatu behar da eta antolakuntzatik diotenez, «ikusentzunezkoetan moldatzen bazara, edo hobe esanda, ideiarik ere ez baduzu, baina gogoz beteta bazaude, azaldu zaitez bihar 18:00etan Gaztetxera, bertan aurtengo lantaldea osatuko dugu-eta. Anima zaitez!!!».
Gazte Olinpiada etzi, larunbatean, hasiko da eta ordurako Olinpik Newsek albiste, emaitza eta berri guztiak eman behar ditu aldiro.
21 taldek hartuko dute parte ‘aro modernoko’ Hernaniko Olinpiaden bosgarren edizioan. Aurreneko bi probak Paella lehiaketa eta Opskarrak izango dira. Paella lehiaketa goizean zehar egingo da eta eguerdian epaituko dituzte. Bazkalostean, Opskarren txanda izango da. Bukatzeko, txaranga abiatuko da herriko kaleak girotzeko. Eta gaualdean hasiko dira kontzertuak: Bad Sound Sistem, Erokomeri eta talde sorpresa.