Gaur emango zaio hasiera 2018ko Euskal Herriko Itzuliari, eta larunbatera arte luzatuko da. Denera, sei etapa burutuko dituzte, eta gaur izango da aurrenekoa, Zarautzetik Zarautzerako bidea osatuko duena.
Lehenengo etapa honetan pasako dira Hernani eta Astigarragatik. Aurreikuspenen arabera, eguerdiko 13:55ak aldera iritsiko dira Hernanira, eta bertatik joango dira Astigarragara.
Hain zuzen, Galarretatik sartuko dira Hernanira, eta zuzen joango dira Txantxillako rotondara arte. Han ere, zuzen jarraituko dute Santa Barbara auzoa zeharkatzen duen errepidetik. Urnieta eta Hernani lotzen dituen rontondaraino iritsiko dira, eta handik hartuko dute A15 autobia, Astigarragarantz.
Herria autobiatik ikusiko dute txirrindulariek, eta Oiartzunerako bidea hartuko dute, bide zaharretik.
Hondarribiaraino eta buelta
Zarautzetik abiatuko da 58garren Euskal Herriko Itzuliaren aurreneko etapa eguerdiko 13:17etan, eta 162,1 kilometroko ibilbidea osatu ostean, 17:18-17:42 artean iritsiko da aurreneko txirrindularia helmugara -Zarautzen izango da, baita ere-.
Zarautzetik, Hondarribiarako bidea egingo dute txirrindulariek, eta orduan pasako dira Urumean zehar. Buelta, Pasaiatik egingo dute, eta orduan, Donostian sartuko dira 15:00ak aldera, eta Igeldotik Oriora pasako dira, Zarautzera iritsi arte.