Dagoeneko pasa dira hilabete batzuk Gipuzkoako Foru Aldundiko Mugikortasun sailak Buruntzaldeako autobus zerbitzuei dagokion aurreproiektua aurkeztu zuenetik.
Herritar eta langileen kezkak Murrizketarik Ez Plataforma sortzea ekarri zuen, eta oraingo honetan eskaera batzuk egin dizkio taldeak Aldundiari. Izan ere, beren ustez, «aurreproiektua onargarria ez den bezala, Aldundiaren jarrera ere onartezina da».
Eta salatzen dute: «beste behin ere, herritarroi bizkarra emanez eta gure iritzia kontuan hartu gabe, hainbat proiektu erabaki eta aurrera atera nahi dira». Beraien ustez, «inposaketaz inposaketa jarraitzen dute eta adibideak ez dira falta».
4.000 bat alegazio, eta 7.000 sinadura
Arazoaren hasiera pasa den urteko abuztuan ezartzen dute: «Foru Aldundiak argitaratu zuen Buruntzaldearako autobus zerbitzuei zuzendutako aurreproiektua. Bertan, dakizuenez, murrizketa nabarmenak proposatzen ziren».
Horren aurrean, «4.000 alegazio inguru sartu, eta 7.000 sinadura bildu ziren». Ez dute ahaztu, ezta ere, «gai honen harira herritarrek egindako hainbat agerraldi eta mobilizazio».
Egun egoeraren berri ez dutela onartzen dute: «egunak aurrera joan dira, eta non gelditu dira Aldundiak alegazioei burutu beharreko erantzunak? Zertan dago aurreproiektu/proiektuaren egoera? Zergatik halako opakotasuna? Non dago hauteskunde-kanpainetan ahoan darabiltzen kudeaketa gardena? Gure egunerokoan eragin zuzena duen gai honen inguruan, herritarrok ez al dugu eskubiderik jakiteko zertan dagoen istorio hau?».
Hiru eskaera
Egoerari buelta emateko, hiru eskaera egiten dizkiote Aldundiari. Aurrenekoa, «utz dezala bertan behera aurreproiektua». Bigarrena: «erakunde publiko bezala, lehenetsi dezala herritarron ongizatea. Berma dezala, gutxienez, egun garraiobide publikoek eskaintzen duten zerbitzua eta ez dadila murrizketarik egon».
Eta hirugarrena, «alboratu ditzala ikuspuntu ekonomizista soilak, eta jar dezala helburu nagusi gisa jendarteari eskaintzen zaion zerbitzua eta berauen kalitatea».