Aste Santua bukatu da, baina oporraldian jarraitzen dute, haur eta gaztetxo astigartarrek. Eta ondo aprobetxatzeko, aukera ugari dauzkate, aste honetan ere.
Kultur etxean, bi tailer hasi ziren atzo, 6-12 urte bitarteko haurrentzat: zientziarekin jolasean aurrena, 10:15etan hasi eta 11:45ak arte; eta sukaldaritza osasuntsua gero, eguerdiko 12:00etatik 13:30etara.
Kiroldegian, berriz, Jolas Txikirekin daukate zita, 2-5 urte bitarteko haurrek, goizeko 09:00etatik 13:00etara. Atzo hasi zen bigarren txanda, eta ostiralean bukatuko da.
Eta Xaguxarrek ere, atzo ekin zion ludotekari berriro, Herri Eskolan, 4-12 urte bitartekoentzat. Goizeko 10:00etatik 13:00etara egongo dira bertan.
Zita bereziak, Gazte Lokalean
Aurreko horietan, aldez aurretik eman behar zen izena; ez ordea, Gazte Lokaleko ekintzetan. Zita bereziak jarri dituzte: Escape Room Mitologik gaur, mendira irteera bihar, sukaldaritza tailerra ostiralean, Iruñako Saltingera larunbatean, eta igandean, bukatzeko, Wii txapelketa lokalean.