Urrezko bi domina Jaime Romerok, pistako Espainiako Txapelketan

Joan den asteburuan, ostira­le­tik igandera, jokatu zen pis­tako Espainiako Txapelketa, kadete eta junior kate­go­ri­e­tan. Tafallako belodromoan izan zen, eta bertan aritu zen Jai­me Romero astigartarra ere, Eus­kadiko selekzioak deituta. Bai­ta bikain aritu ere! Urrezko bi domina ekarri zituen: scratch proban, eta taldekako perse­ku­zio proban.
Scratchean, 5 kilometroko proban, aurrea hartu zien asti­gartarrak, Baleareetako Fran­cesc Benassarri eta Asier Pozo lasartearrari, urrezko domina lortzeko. Taldekako perseku­zio­­­an (3 kilometro), berriz, Pozo, Andoni Espejo eta Haritz Sei­ne­kin aritu zen; eta sailkapen proban bi­ga­rren izan ondoren, Valentzia men­de­ratu zuten fina­lean, segun­du batetik go­rako aldearekin.

Beste bi domina, oso gertu
Baina bi proba horietan ba­ka­rrik ez, beste lau probatan ere ari­tu zen Romero. Eta do­mina gehiago lortzeko aukera ere izan zuen, oso gertu.
Bakarkako persekuzioan (2 kilometro), sailkapen proban laugarren egin ondoren, bron­tzea lor­tze­ko lehia jokatu zuen Pozo­re­kin, baina horretan, aurrea hartu zion lasartearrak, eta lau­ga­rren postuan geratu zen astigarta­rra. 
Antzeko gertatu zitzaion, taldekako abia­dura proban: hirugarren izan zen sailkapen proban, Beñat Carbayeda eta Pozorekin, aurreneko bi tal­de­ak segundu erdira zituztela; bai­na gero, brontzerako lehia galdu zuen Euskadiko hiru­ko­teak, Baleareen kontra.
Ez zuen urruti izan bron­tzezko domina Romerok, 500 metroko proban ere, bakarka. Zazpiga­rren sailkatu zen az­ke­nean, 36,428 segunduko den­bo­rare­kin; baina segundu erdi exka­xera izan zuen probako hiru­ga­rren sailkatua. Pun­tu­a­zio proban, berriz, ez zuen lasterketa bukatu.

Euskadi, selekzio onena
Gainera, selekzioka garaipena lortu zuen Euskadik, kadete eta junior kategoriak batuta. Guz­tira, 30 domina lortu zituen; horietatik 12 urrezkoak. Balea­reak izan zen bigarren, 14 do­minarekin, oso urruti.