2014an hasi zuen Harituz Elkarteak Matazak Indarkeria Sexistaren Kontra egitasmoa, eta 2018 urte honetan, egitasmoa zabaltzea izango da asmoa. Hori azaltzeko, prentsaurrekoa eskaini zuten asteartean Udalak eta Harituz Elkarteak berak elkarrekin; aurrenekoa Zorione Etxezarraga alkateak ordezkatuta, eta bigarrena, Isabel Oterok.
Gipuzkoatik hedatzea, helburu
Gipuzkoa Berdintasuna Ehuntzen planaren baitan kokatzen da proiektua, eta hemendik aurrera, Astigarragatik zabaltzea izango dute helburu: «Gipuzkoako gainontzeko herriei deia egin nahi diegu, bat egin dezaten egitasmoarekin».
Hori hala izanda, aurkezpenean izan ziren Gipuzkoako beste herrietako ordezkariak: Lezo, Beasain eta Billabonako Udaletakoak, eta Lasarte-Oriako Atsobakar zentrokoak.
Bertan aldarrikatu zuten elkarlanaren beharra: «ekintzaren helburu nagusia da emakumeen elkarlana bultzatzea, baita indarkeria sexistaren borrokaren kontrako informazioa partekatu eta ikusaraztea».
Gipuzkoa izango da, hain zuzen, aurtengo kokalekua, «Espainiako beste toki askotan egon ondoren, eta nazioartean, Tunez eta Portugalen babesa lortuta». Izan ere, «nahiz eta ehunaren tradizioa oso sendotuta egon, euskal gizartearen izaera eta orografiagatik ez da hain ohikoa izan».
Dokumentala prestatzen
Horrez gain, iragarri dute Matazen proiektuaren inguruan dokumentala egingo dutela 2018an zehar. Eneko Olasagastik zuzenduko du, eta helburua da proiektua bera eta atzean dauden emakumeen lana kontatzea. Alde batetik, partehartzaileen ahalduntzerako; eta bestetik, indarkeria sexistaren kontra egiten dutenei babesa adierazteko.