«Azkenaldian, gaztetxeak, gaztetxeko kideok eta gaztetxean parte hartzen duten eragile ezberdinek, era ezberdinetako erasoak jasan ditugu; lapurretak, material suntsiketa, etab», azaldu dute. Hori dela eta, aurreko ostiralean Kontrakantxa gaztetxearen bueltan dabiltzanak elkartu ziren gertatutakoa salatzeko.
Atarian, salaketa
Bertan elkartu zirenen ustez, «jakina da sistemak bere iraupenerako era guztietako bitartekoak darabiltzala, eta bere nahiekin bat ez datorren ezer sortzean jo-puntuan geratzen gara. Gaur, gune aske honen atarian, Gaztetxearen atarian salatu behar dugu sistemaren jo-puntuan gaudela».
Izan ere, azaldu zuten: «gune hau eraikitzen dihardugu gau eta egun, sistemaren hatzaparretatik alde egiteko helburuz».
Nabarmendu dute, baita ere, «errepresioak mila aurpegi» dituela: «argi errepikatzen dugu gaztetxean ez dugula inolako eraso sexista, arrazista eta homofoborik onartuko, ezta inolako beste errepresio adierazpenik ere».
Eta bide horretan, «mundu berri baten eraikuntzan gure armarik indartsuenetakoa da gaztetxea, etenik gabeko soka. Errepresio orok tokirik ez duen gune askea», bukatu zuten.