Erregularra izan da joan den asteburua Hernaniko pelotarientzat; 15 partidu jokatu zituzten denera, eta horietatik 7 irabazi zituzten, eta 8 galdu.
Irabazitakoenen artean izan ziren GRAVNI txapelketako hiru partiduak. Gipuzkoa ordezkatzen aritu ziren bost hernaniar, Bizkaiaren kontra: 22-11 irabazi zuten Ioritz Arrietak eta Markel Lizeagak, Bizkaiako Legorburu eta Otaduyen aurka; Ekaitz Cisneros 40-37 gailendu zen 22 urte azpiko trinketean, eskuz banaka; eta Xabat Pagola eta Endika Arizmendik 40-16 irabazi zuten, hauek ere trinketean, baina bikoteka.
Udaberri txapelketa, galdu
Galdu egin zuten, ordea, Unax Uitzi eta Mikel Lasak, Udaberri txapelketako kadete mailako finalean. Lapkeko bikotea, Goikoetxea eta Naldaiz, gailendu zen puntu bakarrarengatik 22-21.
Hasiera-hasieratik markagailua kontra izan zuten hernaniarrek, pelota biziak lagunduta, Lasa atzelariarengan jarri zuten pisu guztia, hernaniarrari aurrean jokatzen ez uzteko. Hala mantendu ziren 21-12 egin arte, orduan altxa ziren hernaniarrak, eta Uitziren lanari esker, 21-21 jarri ziren. Azkenean ez zuten zorte haundirik izan.