Emakume Raketistak izan ziren mundu mailan, 1917an, kirolari profesionalak izan ziren aurreneko emakumeak. 1980ra artekoa izan zen haien jarduna. Ordutik gaur arte, ordea, isiltasuna izan da nagusi.
Hori horrela, Emakume Raketisten historia ezagutzeko jardunaldiak egingo dira Hernanin, apirilaren 6aren bueltan; Jarduera Fisikoa eta Kirolaren Nazioarteko Egunaren bueltan, hain justu. Hala azaldu zuten ostiraleko aurkezpenean, Esti Aldeiturriaga kirol zinegotziak, Koro Etxeberria kultura zinegotziak eta Amaia Irazustabarrena palista eta raketista hernaniarrak.
Erakusketa, apirilaren 4tik
Aldeiturriagak azaldutakoaren arabera, «apirilaren 6a Jarduera Fisikoa eta Kirolaren Nazioarteko Eguna da. Euskal Herriko Raketistek proposamena egin ziguten haien historia berreskuratzeko, eta zer egokiagoa, emakumeek historian zehar egindako lana, ezkutuan egon dena, plazaratzeko». Gaineratu zuen, «gizonen ikuspegitik kontatu» izan dela kirolaren inguruko historia, baina «emakume raketista profesionalak bizi izan dira, eta etorkizuna ere badute».
Horrela, hiru jarduera antolatu dituzte. Batetik, erakusketa jarriko da Biterin, apirilaren 4tik 12ra, arratsaldez (17:00-20:00), «raketisten ibilbidea jasotzen duena», azaldu zuen Etxeberriak. «Mundu mailan aurreneko emakume kirolari profesionalak izan zirela esaten da, eta diru asko irabazten zutela; askorentzat, familiak behar zuen diru-iturria ziren. 15 urterekin Madrilera eramaten zituzten, eta eskolak sortu ziren. Askok Ameriketara ere egin zuten salto. Baina kanpoan arrakasta izan arren, Euskal Herrian ez ziren oso begi onez ikusten, eta 1980tik hona sekretupean egon da historia, talde honek ekimena martxan jarri arte».
Irazustabarrenak, partidua
Hain zuzen, talde horretako partaide da Amaia Irazustabarrena palista eta raketista hernaniarra, eta apirilaren 6an erakustaldia egingo du. Frontoian, raketisten partidua jokatuko da, 19:00etan; debalde ikusi ahal izango da lehia, Irazustabarrena eta Maria Saez arabarrak osatutako bikotearen eta Amaia Araiztegi mallabiarrak eta Bidaniako Miren Larrartek osatutakoaren artean.
Partidua ikusgarria izango dela argi dago. «Diferentea da: azkarragoa eta arriskutsua da», azaldu zuen Irazustabarrenak. Gainera, garaiko materiala eta jantziak berreskuratzen ari dira, eta zertxobait moldatuta bada ere, orduko jantziekin jokatuko dute.
Historia bizia, dokumentalean
Azken zita, apirilaren 12an izango dela argitu zuten; 19:00etan Biterin, Raketistak lehen eta orain dokumentala (trailerra, behean) ikusi ahal izango da. Jon Juanes Iragorri, Koro Iragorri zendutako raketista oiartzuarraren semea, izan zen gaia ikertzen hasi zenetako bat, eta dokumentalean bildu du orain arte ikertutakoa. Tartean agertzen dira oraindik bizi diren 90 urte inguruko hainbat emakume, raketistak izandakoak.