Larunbatean Kadeteen Ohorezko Neskek Eibarren kontra Zubipen jokatutako partiduan emakume-arbitroak irain matxistak jasan zituela salatu du Gipuzkoako Futbol Arbitroen Federakuntzak. Eta berehala heldu da talde eta erakunde publikoen babesa.
Alde batetik, «elkartasuna eta babesa» adierazi dizkio arbitroari Denis Itxaso kirol diputatuak, Foru Aldundiaren izenean: «benetan uste badugu kirolak balioetan hezteko tresna izaten jarraitu behar duela, ezin ditugu onartu kirolaren berezko izaera suntsitzen duten eta bizikidetzako balio oinarrizkoenen kontra egiten duten jarrerak».
Era berean gaitzetsi du gertatutakoa Eibarrek: «ez dugu bat egiten, eta ez dugu onartzen klubetik kanpo daudenen jarrera hau; gertatutakoa aztertuko dugu beharrezko neurriak hartzeko».
Gaitzespena ere, CD Hernanik
Ildo beretik argitaratu zuen oharra CD Hernanik: «ez dugu jarrera matxistarik onartzen eta gertatutakoa salatzen dugu. Guztiaren gainetik errespetua defendatzen dugu, batez ere, beren lanean profesionalak diren epaileekiko». Eta argi eta garbi esan zuten: «arauak betetzen ez dituen hori ez da inolaz ere ongietorria Zubipen».