Aurten ere ez du huts egingo, Basque Culinary Centerren, bertsoen eta gutizien arteko nahasketa berezi bezain aberatsak. Apirilaren 20an izango da Bertso Gutiziak saioa, Kronikak antolatuta, Insalusen laguntzarekin.
Eta saioaz gozatzeko sarrerak, dagoeneko salgai daude. Joan den astean, Dobera-Kronikako bazkideek izan zuten sarrerak lortzeko aukera; eta gaurtik, herritar guztien eskura daude. Hernanin, Dobera-Kronikaren bulegoan (Larramendi kalea 11, behea) erosi daitezke, eta Kixkal eta Aralar tabernetan; Ereñotzun, Irrintzi tabernan; Goizuetan, Amaia kafetegian; eta Astigarragan, Ikatza tabernan.
22 euro dira; bazkideentzat, 20 euro. Saioa bukatzean, Hernanira bueltatzeko autobusa ere izango da, 23:30ak aldera. Horretarako, Dobera-Kronikan eman behar da izena, bulegoan edo 943 33 08 99 telefonoan.
Lujanbio, Agirre, Mendiluze eta Sarriegi, bertsotan
Aurreko urteetan bezala, bertso saioarekin hasiko da ekitaldia. Eta aurten ere, puntakoa izango da, Bertsolari Txapelketa Nagusiko lau finalistarekin: Unai Agirre, Maialen Lujanbio, Aitor Mendiluze eta Aitor Sarriegi. Amaia Agirre ariko da gai-jartzaile lanetan.
Basque Culinary Centerreko areto nagusian izango da hori, eta bukatutakoan, egongelara mugituko dira, gutizia bereziz osatutako luntx-afariaz gozatzera, bertako sukaldaritza ikasleek prestatuko dutena.