Erramu igandea zen atzo, eta hortaz, erramuak bedeinkatzeko mezak egin zituzten, Urumea bailarako elizetan; Hernanin, Ereñotzun, Goizuetan eta Astigarragan. Horrekin, hasiera eman zioten Aste Santuari.
Hernaniko San Joan Bataiatzailearen parrokian egin zuten azkenekoa, eguerdiko 12:00etan; eta berezia izan zen, Lehen Hezkuntzako 6garren mailako ikasleen laguntza izan baitzuen parrokoak, elizkizunean. Eta hasieran herritar guztien erramuak bedeinkatu bazituen, mezaren bukaeran gaztetxo horienak bedeinkatu zituen, espreski.
Ostegun Santutik Pazko Igandera, elizkizunak
Atzo hasi zen Aste Santua, eta beraz, datorren ostegunetik, Ostegun Santutik hasi eta Pazko Igandera arte, izango dira elizkizunak. Ostegunean, Jaunaren Afariko meza egingo dute: Ereñotzuko San Antonion 18:00etan; Floridako San Jose Langilean 19:30etan; San Joan Bataiatzailean 20:00etan; Goizuetan, 08:00etan penitentziako sakramentuaren eginkizuna, eta 19:00etan Azken Afariko meza; eta Aranon, 11:00etan aitortza eta 17:00etan meza.