Dagoeneko ohitura bihurtu da Hernaniko Eskubaloi Taldearentzat Aste Santuetako oporretan Portugalera bisita, bertan egiten duten Andebolmania Nazioarteko Eskubaloi Txapelketan parte hartzeko. Gaur abiatuko dira, goizeko 08:00ak aldera, eta bihar hasiko dute lehia, Sào Joào de Madeiran. Buelta apirilaren 1ean egingo dute, topaketa bukatu ondoren.
Hirugarrenez bidaiatuko dute bertara, aurrekoetan baino indar gehixeagorekin: «aurreko denboraldiko bizipen oparoak eta gure jokalariek erakutsitako jarrerak, HETekoak Sào Joào da Madeirara bidaliko duten ordezkaritza haunditzera animatu ditu», iragarri dute.
80 neska-mutil inguru, larunbatera arte
Hain zuzen ere, iaz hiru talde izatetik, aurten bost taldeko ordezkaritza izatera pasako dira: hiru infantil (neskena bat, eta mutilena bi); eta bi kadete (bakoitzetik bana). Hortaz, denera 80 bat jokalarik jokatuko dute Hernaniko armarripean. Eta haiekin batera joango dira, baita ere, 15 entrenatzaile. Jarraitzaileek ere, ez dute huts egingo eta HETek adierazi bezala, «ordezkaritza eder batek bidaiatuko du Portugal aldera bere taldea animatzera».
Gastu ekonomiko ia osoa estalita
Sào Joào de Madeira herrian bertan egingo dute egonaldia; bertako eskoletan egingo dute bai lo, baita otorduak ere. «Topaketan parte hartzeak suposatu duen ia gastu ekonomiko osoa errifen eta helburu horrekin antolatutako hainbat ekintzaren bitartez kubritu da, horrela jokalari denek parte hartzeko aukera izan dezaten, horrek familientzat zama ekonomiko haundia suposatu gabe», azaldu dute.
Gainera, Taldeak adierazi du «garrantzia haundia» ematen diola halako ekimenei: «alde batetik, elkarbizitzarako aukera ezin hobea delako, eta bestetik, beste herrialdeetan kirol hau jokatzeko modu desberdinak ikusteko aukera ematen duelako».
Honekin, Eskubaloi taldeak erakutsi nahi du «kirola beste modu batean ulertu daitekeela».
Bihar hasi eta larunbatera arte jokatuko dute Andebolmania 18 Nazioarteko Eskubaloi Topaketan.
Oportotik gertu, kirol instalazio oparoekin
Sào Joào de Maideira Oportotik 40 kilometrora dagoen herria da, 23.000 biztanle ditu, eta halako topaketa bat egiteko egokia da kirol ekipamendu aldetik oso oparoa delako.
Bera Beran, txapeldun!
Bera Bera eskubaloiak antolatuta, Street Handball Txapelketa egin zuten larunbatean, eta bertan izan zen Hernani Eskubaloi Taldeko taldetxo batek.
Infantil-mailan, lau nesken taldetxoa izan zen bertan Hernaniren izenean parte-hartzen, eta txapeldun bilakatu ziren. Eskubaloi Taldeak zoriondu egin ditu