Hernaniko Txistulari Jaialdiak 13garren edizioa du aurtengoa, eta ohi bezala, Txistulari Gazteen Lehiaketa jokatuko da gaur, eta topaketa egingo da bihar.
Gazteenen kategorian inoiz izan den parte-hartze haundiena izango da aurten, eta tartean ariko dira hernaniarrak.
Bakarlariak eta taldeak
Goizeko 11:00etan emango zaio hasiera Hernaniko Txistsulari Gazteen Txapelketari, Milagrosan.
Aurrena, A kategoriako gaztetxoak, 12 urte arteko bakarlariak ariko dira. Guztira, 18 txistularik hartuko dute parte. Segidan, B kategoriakoen txanda izango da: 13 eta 16 urte arteko bakarlariena. Hemen 16 txistularik eman dute izena; tartean, Enara Arruti Santakruz (Ereñotzu) eta Julen Beraza Peña, Ane Telletxea Iturralde eta Manex Zabaleta Ugalde hernaniarrek.
Arratsaldeko 17:00etan jarraituko du txapelketak, D kategoriako lehiakideekin; taldeekin, alegia. Guztira bost ariko dira, Hernaniko Txilibita txistu taldea barne.
Sari banaketa arratsaldeko 18:00ak aldera egitea aurreikusten da. Denera, 48 txistularik hartuko dute parte.
Topaketarekin, festa
Jaialdia borobildu eta festa giroa jartzeko, berriz, topaketa egingo da bihar. Txoko guztietako txistulari gazte eta heldu, 10:00etan elkartuko dira diana jotzeko, eta 12:30etan kalejiran aterako dira berriro, Plaza Berrin (edo euria eginez gero, arkupetan) dantzarako doinuekin bukatzeko.